«Rodrining ikkilanishi menda ham shubha uyg‘otdi». Mourinio yarimhimoyachining «Real»ga transferi nega amalga oshmaganini tushuntirdi

«Real» bosh murabbiyi Joze Mourinio Rodrining «Manchester Siti»dan Madrid klubiga transferi nega amalga oshmaganini tushuntirdi.

«Men u bilan bir necha marta gaplashdim va «Real» unga juda yaxshi taklif berdi. Menimcha, uning «Manchester Siti» bilan munosabatlari juda yaxshi. Klub «Siti» bilan muzokara olib bormasdan, Rodri bilan bog‘lanib, unga katta taklif qildi. Rodrida shubhalar paydo bo‘ldi, u ikkilanib qoldi va uning ikkilanishi menda ham shubha uyg‘otdi.

U ajoyib futbolchi va bizga nisbatan juda hurmat bilan munosabatda bo‘ldi. U haqida yomon gap ayta olmayman. Ammo «Real» shunday katta klubki, unda o‘z qarorlariga shubha qiladigan futbolchilar bo‘lmasligi kerak. Siz futbolchi bilan bog‘lanasiz, u esa: «Qachon kelishim kerak?» deb so‘raydi. Konsepsiya taxminan shundan iborat.

Shunga qaramay, u bizga juda hurmat bilan munosabatda bo‘ldi. Unga omad tilayman…», — dedi Mourinio.

Eslatib o‘tamiz, Rodri 18-avgust kuni «Manchester Siti»dan «Barselona»ga o‘tgan. Kataloniya klubi 30 yoshli yarimhimoyachi bilan 2030-yil 30-iyungacha shartnoma imzolaganini e’lon qilgan.

Ma’lumot uchun, avvalroq Rodri «Real» bilan shaxsiy shartnoma shartlarini kelishib olgani haqida xabarlar tarqalgan edi. Keyinchalik «Barselona» transfer uchun kurashga qo‘shilib, futbolchi kataloniyaliklar taklifini tanlagan.