Namanganning «Navbahor» klubi jamoa bosh murabbiyi Sergey Lushan bilan tuzilgan mehnat shartnomasini bekor qildi.
«Biz Sergey Ivanovichga «Navbahor»dagi faoliyati uchun o'z minnatdorchiligimizni bildirgan holda, keyingi faoliyatida omad yor boʻlishini tilaymiz», — deyiladi klub bayonotida.
Lushan oʻtgan mavsumning ikkinchi yarmida «lochinlar» boshqaruviga kelgandi. Uning qoʻl ostida klub Oʻzbekiston Superligasida 35 ta oʻyin oʻtkazib, 16 ta gʻalaba, 9 ta durang va 10 ta mag'lubiyat qayd etdi.
Oʻzbekiston Kubogi doirasida esa 8 ta oʻyinda maydonga tushib, 5 marta gʻalaba qozondi, 1 ta durang o'ynadi va 2 bor magʻlubiyatga uchradi.
