Fransiyalik markaziy himoyachi Malang Sarr erkin agent sifatida Saudiya Arabistonining «NEOM» klubiga o‘tishga rozilik berdi.
Insayder Fabritsio Romano xabariga ko‘ra, tomonlar barcha shartlar bo‘yicha kelishuvga erishgan va transfer yakunlangan. Futbolchi yangi jamoasi bilan shartnoma imzolashi kutilmoqda.
Manbaga ko‘ra, Sarrga Yevropaning yana beshta klubi qiziqish bildirgan. Shunga qaramay, 27 yoshli himoyachi «NEOM» loyihasini tanlashga qaror qilgan.
Shu tariqa, Saudiya Pro-ligasiga yangi qo‘shilgan «NEOM» yozgi transfer oynasidagi navbatdagi transferini amalga oshirib, himoya chizig‘ini Malang Sarr bilan kuchaytirmoqda.
Qayd etish joiz, Malang Sarr faoliyati davomida «Nitstsa», «Chelsi», «Portu», «Monako» va «Lans» kabi klublarda to‘p surgan. Endilikda u faoliyatini Saudiya Arabistonida davom ettiradi.
