«Liverpul» va «Arsenal» sobiq futbolchisi Jermeyn Penant Londonda sayr qilib yurganida it hujumiga uchrab, jarohat oldi. Bu haqda The Sun nashri xabar berdi.
Ma’lum qilinishicha, Jermeyn o‘z itini himoya qilishga uringanida hodisa qurboniga aylangan. Tajovuzkor nemis ovcharkasi Penantning King laqabli amerikalik akita zotidagi itiga hujum qilgan.
Uy hayvonini himoya qilish uchun aralashgan sobiq futbolchini it yiqitib, oyog‘idan tishlagan. Voqea davomida Penantning iti ham unga yordam berib, hujum qilgan hayvonga qarshilik qilgan.
Futbolchi zudlik bilan shifoxonaga olib borilgan. Shifokorlar uning chuqur yaralarini davolab, 50 dan ortiq chok qo‘yishgan. Hozirda Penantning ahvoli yaxshi ekani aytilmoqda. U hozircha politsiyaga murojaat qilishni rejalashtirmayapti.
Ma’lumot o‘rnida, Jermeyn Penant faoliyati davomida «Liverpul», «Arsenal», «Birminghem Siti», «Uotford», «Lids», «Portsmut», «Stok Siti» va boshqa klublarda to‘p tepgan.
Muxlislar bu yangilikni Telegram’da muhokama qilmoqda
Izohlar Telegram’da ochiladi