«Ливерпул» ва «Арсенал» собиқ футболчиси Жермейн Пенант Лондонда сайр қилиб юрганида ит ҳужумига учраб, жароҳат олди. Бу ҳақда The Sun нашри хабар берди.
Маълум қилинишича, Жермейн ўз итини ҳимоя қилишга уринганида ҳодиса қурбонига айланган. Тажовузкор немис овчаркаси Пенантнинг Кинг лақабли америкалик акита зотидаги итига ҳужум қилган.
Уй ҳайвонини ҳимоя қилиш учун аралашган собиқ футболчини ит йиқитиб, оёғидан тишлаган. Воқеа давомида Пенантнинг ити ҳам унга ёрдам бериб, ҳужум қилган ҳайвонга қаршилик қилган.
Футболчи зудлик билан шифохонага олиб борилган. Шифокорлар унинг чуқур яраларини даволаб, 50 дан ортиқ чок қўйишган. Ҳозирда Пенантнинг аҳволи яхши экани айтилмоқда. У ҳозирча полицияга мурожаат қилишни режалаштирмаяпти.
Маълумот ўрнида, Жермейн Пенант фаолияти давомида «Ливерпул», «Арсенал», «Бирмингҳэм Сити», «Уотфорд», «Лидс», «Портсмут», «Сток Сити» ва бошқа клубларда тўп тепган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади