14 iyundan 15 iyunga o‘tar kechasi AQSH poytaxti Vashington tarixiy oqshomga mezbonlik qiladi. Oq uy fonida tashkil etiladigan UFC White House — Freedom 250 turnirining markaziy jangi yengil vazn chempioni Iliya Topuriya va vaqtinchalik chempion Jastin Getji o‘rtasida bo‘lib o‘tadi.
Topuriya uchun bu chempionlik kamarining ilk himoyasi bo‘ladi. Ispaniyalik jangchi o‘tgan yili divizion qiroli maqomini qo‘lga kiritgan, biroq oilaviy sabablar tufayli uzoq vaqt oktagonga chiqmagan edi.
Shu sababli UFC vaqtinchalik kamar uchun Jastin Getji va Peddi Pimblett jangini tashkil qildi. Ko‘pchilik britaniyalik yulduzning g‘alabasini kutgan bo‘lsa-da, tajriba o‘z so‘zini aytdi. Getji raqibini mag‘lub etib, yana vaqtinchalik chempionga aylandi.
37 yoshli amerikalik UFC tarixidagi eng tomoshabop jangchilardan biri sanaladi. Uning deyarli har bir jangi haqiqiy urushga aylanadi. Getji faoliyati davomida 10 marta «Tunning eng yaxshi jangi» bonusini qo‘lga kiritgan va ko‘plab muxlislar uchun aynan u aralash yakkakurashlar olamiga kirish eshigi bo‘lgan.
Bu jang Getji uchun ehtimol so‘nggi chempionlik imkoniyati bo‘lishi mumkin. Yoshi va diviziondagi kuchli raqobatni hisobga olganda, mag‘lubiyat uning to‘liq kamar sari yo‘lini ancha murakkablashtiradi.
Shu bois Oq uyda bo‘lib o‘tadigan tarixiy oqshomda Jastin Getjining motivatsiyasi har qachongidan ham yuqori bo‘ladi.
