14 июндан 15 июнга ўтар кечаси АҚШ пойтахти Вашингтон тарихий оқшомга мезбонлик қилади. Оқ уй фонида ташкил этиладиган UFC White House — Freedom 250 турнирининг марказий жанги енгил вазн чемпиони Илия Топурия ва вақтинчалик чемпион Жастин Гетжи ўртасида бўлиб ўтади.
Топурия учун бу чемпионлик камарининг илк ҳимояси бўлади. Испаниялик жангчи ўтган йили дивизион қироли мақомини қўлга киритган, бироқ оилавий сабаблар туфайли узоқ вақт октагонга чиқмаган эди.
Шу сабабли UFC вақтинчалик камар учун Жастин Гетжи ва Педди Пимблетт жангини ташкил қилди. Кўпчилик британиялик юлдузнинг ғалабасини кутган бўлса-да, тажриба ўз сўзини айтди. Гетжи рақибини мағлуб этиб, яна вақтинчалик чемпионга айланди.
37 ёшли америкалик UFC тарихидаги энг томошабоп жангчилардан бири саналади. Унинг деярли ҳар бир жанги ҳақиқий урушга айланади. Гетжи фаолияти давомида 10 марта «Туннинг энг яхши жанги» бонусини қўлга киритган ва кўплаб мухлислар учун айнан у аралаш яккакурашлар оламига кириш эшиги бўлган.
Бу жанг Гетжи учун эҳтимол сўнгги чемпионлик имконияти бўлиши мумкин. Ёши ва дивизиондаги кучли рақобатни ҳисобга олганда, мағлубият унинг тўлиқ камар сари йўлини анча мураккаблаштиради.
Шу боис Оқ уйда бўлиб ўтадиган тарихий оқшомда Жастин Гетжининг мотивацияси ҳар қачонгидан ҳам юқори бўлади.
