«Катта дубулға» турнирларининг икки карра чемпиони, жаҳоннинг иккинчи ракеткаси Александр Зверев йил якунида илк бор жаҳон рейтингида биринчи ўринни эгаллайди ва бундай мақомга эришган энг ёши катта теннисчига айланади.
ATP ташкилоти 2026 йилги якуний рейтингни эълон қиладиган 23 ноябр санасида германиялик теннисчи 29 ёш 217 кунлик бўлади.
ATP матбуот хизмати маълум қилишича, Зверевга қадар йил якунида жаҳоннинг биринчи ракеткаси бўлган энг ёши катта теннисчи америкалик Андре Агасси эди. 1999 йилда якуний рейтинг эълон қилинган пайтда «Катта дубулға» турнирларининг 8 карра ғолиби 29 ёш 214 кунлик бўлган.
Йил якунида жаҳоннинг биринчи ракеткаси бўлган энг ёши катта теннисчилар орасида учинчи ўринда «Катта дубулға» турнирларининг 3 карра чемпиони Энди Маррей туради. У 2016 йилда бу натижага эришганида 29 ёш 197 кунлик эди.
Зверевнинг рейтингдаги етакчилигига Шанҳайдаги «Мастерс» турнирининг учинчи босқичида жаҳоннинг учинчи ракеткаси, испаниялик Карлос Алкараснинг мағлубияти сабаб бўлди. Бу натижадан сўнг испаниялик теннисчи мавсум якунига қадар Зверевдан ўзиб кетиш имкониятини йўқотди.
Бундан ташқари, жаҳоннинг биринчи ракеткаси, италиялик Янник Синнер ҳам тизза жароҳати сабабли мавсумни муддатидан олдин якунлашини маълум қилганди.
Зверев йилни 1-ўринда якунлайдиган энг ёши катта теннисчи бўлади
Теннис
13 октябр, 08:54
У бу борада Агассининг рекордини янгилайди.
Foto: Getty Images
