Теннис. Алкарас Шанҳайдаги турнирни 3-босқичдаёқ тарк этди

Жаҳон рейтингининг учинчи рақамли теннисчиси, испаниялик Карлос Алкарас Шанҳайда ўтаётган «Мастерс» турнирининг тўртинчи босқичига йўл ололмади. У рейтингда 39-ўринда бораётган белгиялик Зизу Бергсга 5:7, 6:7 ҳисобларида мағлуб бўлди.

Теннисчилар кортда 2 соат 3 дақиқа ҳаракат қилишди. Беллашув давомида Зизу Бергс 9 та эйсни амалга оширди ва 1 марта қўшалоқ хатога йўл қўйди. Шунингдек, у 4 та брейк-пойнтдан 3 тасини муваффақиятли амалга оширди.

Карлос Алкарас эса учрашув давомида 5 та эйсни қайд этди, 2 марта қўшалоқ хатога йўл қўйди ва ўзи ишлаб олган 2 та брейк-пойнтнинг ҳар иккаласидан ҳам унумли фойдаланди.

Шанҳайдаги турнирнинг чоракфиналига чиқиш учун Бергс америкалик Томми Пол ва монаколик Валантен Вашеро ўртасидаги баҳс ғолиби билан кортга чиқади.