Бременнинг «Вердер» ва Берлиннинг «Ҳерта» клублари собиқ мураббийи Александер Нури футболни тарк этиб, бизнес соҳасида фаолиятини давом эттиришга қарор қилди.
46 ёшли мутахассис "Макдоналдс" тармоғининг франшизаларини бошқариш билан шуғулланади, бу ҳақда The Athletic нашри хабар берди.
2026 йил бошидан Нури тармоқнинг иккита ресторани бошқарувини ўз қўлига олди ва июл ойида учинчи ресторан ҳам собиқ мураббийга ишониб топширилди.
Яқин ўтмишда Бундеслига жамоасини бошқарган собиқ мураббийи қўл остида 150 дан ортиқ ходим фаолият юритади. Таъкидланишича, Нури бунгача ошхонада ишлаш ва грилда бургер пиширишни ўз ичига олган тўлиқ ўқув курсини тамомлаган.
Қизиқарли томони, Нури мураббийлик бўйича лицензияни Юлиан Нагелсман билан бир гуруҳда олган.
Маълумот учун, Нури «Вердер»даги фаолияти билан кенг оммага танилган — у 2016 йилда ўринбосарлар жамоасидан кўтарилиб, асосий жамоа бошқарувига келган. Унинг бошчилигида клуб мағлубиятсиз 11 ўйинлик серия қайд этган, бироқ 2017 йил октябр ойида натижалар ёмонлашгани сабабли мутахассис истеъфога чиқарилган.
Шундан сўнг Нури «Инголштадт»да ишлаган, «Ҳерта»да Юрген Клинсманга ёрдамчилик қилган. Унинг мураббий сифатидаги сўнгги иш жойи эса Грециянинг «Кавала» клуби бўлиб, у ердан 2022 йилда кетган.
Нури футболдан кетиш қарори пухта ўйланган ва оқилона бўлганини, Юрген Клинсман ва Грегг Берҳалтер билан ишлаш давомида орттирган бошқарув тажрибаси эса ҳозирги бизнесини юритишда ёрдам бераётганини қайд этади.
