Умарали Раҳмоналиев: «Олд Траффорд»да ўзимиз кутган ҳис-туйғуларни ололмадим»

Хабарингиз бор, Ўзбекистон миллий жамоамиз ФИФА кунларидан фойдаланиб Тошкентда ўқув-машғулот йиғинини бошлади. Бу жаҳон чемпионатидан кейинги жамоамизнинг дастлабки тайёргарлик жараёни ҳисобланади. Ушбу йиғин давомида Эрон, Сурия ва Жанубий Корея термаларига қарши ўртоқлик ўйинлари ўтказилади.

Йиғинга таклиф қилинган футболчилар орасида Озарбайжоннинг «Сабах» клубида муваффақиятли фаолият олиб бораётган ярим ҳимоячимиз Умарали Раҳмоналиев ҳам бор.

Tribuna.uz журналисти эса Раҳмоналиевдан интервю олди.

- Умарали, миллий жамоамизга яхши кайфиятда келганингиз кўриниб турибди. Жаҳон чемпионатидан кейинги илк йиғин бўйича таассуротлар қандай?

- Ҳар бир футболчи миллий жамоанинг йиғинига иштиёқ ва албатта яхши кайфиятда келади, ватан жамоасини ҳимоя қилиш ҳамма уючун фахр, биринчи кундан сўнг машғулот жараёни ва ички муҳит аъло даражада.

- «Сабах» клубидаги фаолиятингиз ёрқин чиқаётгани биз учун ҳам қувонарли. Ростини айтинг-чи, у ердаги фаолиятингиз ўзингиз кутганингиздан ҳам кўра аъло чиқяптими ёки айнан шундай тасаввур қилганмидингиз?

- Тўғри айтдингиз, ҳозирда Аллоҳнинг қудрати билан ўзим кутгандек ўйин формасига киришга муваффақ бўляпман, лекин ҳали яна кўп меҳнат қилишга тўғри келади.
- Европа Чемпионлар лигасида иштирок этиш бахтига муяссар бўляпсиз. Бунинг гашти қандай экан?

- Ўйлашимча, ҳар бир олдига катта мақсад қўйган футболчининг ниятларидан бири Чемпионлар лигасида иштирок этиш ва шу қатори меники ҳам. Ўйинга чиққанингизда лаҳзалар ичида босиб ўтилган машаққатли йўллар хаёлингиздан тезда ўтиб кетаркан.
- «МЮ»га қарши «Олд Траффорд»даги ўйин ҳақида сўрамоқчи эдим. «Олд Траффорд»ни орзулар театри деб аташади. У ерда ўйнаганингизда нималарни ҳис қилдингиз?

- Ўзимиз кутгандек натижа қайд этмаганимиз учунми, биз кутгандек ҳис-туйғуларни ололмадим, тўғриси татимади. Ҳамма айтиши мумкин «аниқ эди-ку ютқазишинглар» деб, лекин бу ҳисобда ютқазишга лойиқ эмас эдик.

- ЕЧЛда «Сабах» уйида «Барселона»ни қабул қилади. Бу сиз унга қарши ўйнашингиз мумкин бўлган орзуингиздаги жамоами?

- «Барселона» жаҳоннинг энг кучли 5 жамоасидан бири. Мен учун принципиал бўлган жамоа деб айтолмайман, лекин бу каби клубларга қарши ўйнаш яхши тажриба ва келажак учун яхши имкониятларни очиши мумкин.

- «Сабах»ни олдига ЕЧЛда қандай вазифа қўйилган?

- Босим берадиган вазифа йўқ, максимум натижа қайд этиш ва ўзимиз хоҳлаган, ҳар доим ўйнаб келаётган ўйин стилимизни топ-жамоаларга қарши ҳам қўрқмасдан намойиш этиш.

- «Сабах» чемпионатда 5 та ўйинда 5 та ғалаба қозонди. Жамоани бундай кучли стартни бошлашига асосий сабаб нима?

- Ҳозир жамоада ҳамма яхши формада ва яна яхши ўйинчилар билан шартнома имзоланди.

- Умуман олганда, Озарбайжон билан Ўзбекистон чемпионати даражаларини қандай солиштира оласиз?

- Энди, солиштириш ким қандай қарашига боғлиқ. Ҳар бир чемпионатнинг ўзига яраша кучли жиҳатлари бор. Озарбайжон билан солиштирганда, кўпроқ интенсив футболга ёндашилган.

- «Сабах» клубидан кейинги мақсад ва режангиз қандай?

- «Сабаҳ»да насиб қилганича боримни бериб, жамоа ютуқлари учун ҳисса қўшиб, кейин мақсад қилганимиздек, дунёнинг янада яхши чемпионатларига кўчиб ўтиш.