UFC собиқ жангчиси: «Махачев услубини ўзгартириши керак. Унга ярим ўрта вазнда осон бўлмайди»

UFC’нинг ярим ўрта вазн тоифасида собиқ чемпионликка даъвогар, ҳозирда эса PFL Europe’да жангчилар билан ишлаш бўлими раҳбари, шарҳловчи ва бош таҳлилчи бўлиб фаолият юритаётган британиялик Дэн Ҳарди 77 кг гача бўлган вазнда UFC чемпиони ҳисобланган, россиялик Ислом Махачевни ўз жанг услубига ўзгартишлар киритишга чақирди.

«Шубҳасиз, ярим ўрта вазндаги жангчиларни 25 дақиқа давомида назорат қилиш анча қийин. Ўйлайманки, Махачев буни сўнгги жангида англаб етди… Унга қийинроқ бўлади. Биринчи қаторда жангни кузатиб, унга қарши чиқишга тайёр турган бошқа йигитларга қаранг. Уларнинг ҳеч бири билан жанг Махачев учун осон кечмайди. Уларнинг барчаси нафақат Исломнинг ўзидан, балки Гэрридан ҳам йирикроқ.

Махачев шундай вазн тоифасига ўтдики, бу ерда жангчилар — бу сўзларни жуда аниқ таъкидлаб айтяпман — 7 кг оғирроқ вазнга эга. Улар аввалги вазндагиларга қараганда мушакдор ва гавдалироқ. Бўйи 188-193 см бўлган рақибларга қарши жанг қиласиз. Бу ярим ўрта вазн жангчиларининг айримлари ҳақиқатан ҳам кенг ва катта елкаларга, узун қўл ва оёқларга эга. Уларни йиқитиш қийин, чунки доимо таяниш учун бирор бир аъзоси топилади.

Махачев ўз жанг услубини ўзгартириши керак. Агар у ярим ўрта вазнда қолиб, чемпионлик камарини ҳимоя қилишга ҳаракат қилса, менимча, айнан шу ерга мослашади. У матонат ва чидамлиликка анча кўпроқ таянади, деб ўйлайман. Мераб Двалишвили дивизиондаги пастроқ бўйини айнан шу жиҳат билан қоплаган. У рақибларини шунчаки анча кўпроқ ишлашга мажбур қиларди. Волкановскида ҳам худди шундай. Бу икки жангчидан ўрганиш мумкин бўлган жиҳатлар кўп — улар бўй жиҳатдан кичикроқ бўлишган, аммо кучли томонлари асосида жанг услубини яратишгани учун шундай самарали бўлишган», — дея Ҳардининг сўзларидан иқтибос келтирмоқда MMA Mania портали.