«Ўзбек футбол бозори биз учун қизиқарли» — Дмитрий Игдисамов

Россия футболидаги энг машҳур ва совриндор клублардан бири — Москва ЦСКАси сўнгги вақтларда Ўзбекистон футбол мухлислари учун ҳам янада қизиқарли жамоага айланди. Бунинг сабаби эса оддий: «армиячилар»ни юртимизга дахлдор икки мутахассис — бош мураббий Дмитрий Игдисамов ва унинг ёрдамчиси Денис Коростиченко бошқармоқда.

Игдисамовнинг ҳикояси эса алоҳида қизиқ. У Тошкентда, аниқроғи, Сергелида туғилган. Футболдаги илк қадамларини ҳам айнан шу ерда ташлаган. Бугун эса болалиги ўтган кўчалардан минглаб километр узоқда — Москвадаги ЦСКАдек улкан клубнинг бош мураббийи.

Яна бир қизиқ жиҳати: Игдисамовни футболга олиб кирган инсон — Денис Коростиченко бугун унинг ЦСКАдаги ёрдамчиси. Улар Сергелида танишганига ҳам қарийб 30 йил бўлди. Бир пайтлар футбол майдонида бошланган танишув бугун Россиянинг энг нуфузли клубларидан биридаги ҳамкорликка айланган.

Tribuna.uz Тошкентда туғилган ва айни пайтда ЦСКАни бошқараётган Дмитрий Игдисамов билан эксклюзив суҳбат уюштирди.

- Дмитрий Игоревич, аввало, ушбу интервюга розилик билдирганингиз учун ташаккур. Мухлисларимиз учун бу ҳақиқатан ҳам жуда қизиқ. Айниқса, ЦСКА жамоасини Ўзбекистонга бевосита алоқадор бўлган мутахассислар бошқараётгани биз учун ҳам алоҳида қизиқиш уйғотмоқда.

- Шуҳрат, ассалому алайкум, биз учун ҳам бу суҳбат ёқимли. Чунки ватанда бизни унутиб юборишмагани, ишимиз билан қизиқишаётганидан хабардор бўлиш жудаям бошқача. Бунинг учун сизга ҳам раҳмат айтмоқчиман.

- Дмитрий Игоревич, сиз 1986 йилда Тошкентда туғилгансиз. Болалигингиз қандай ўтган? Футболга қандай кириб келгансиз ва қачон Россияга кўчиб кетгансиз?

- Ҳа, мен 1986 йили Тошкентда туғилганман. Сергели массивида. Янада аниқроқ айтсам, «Спутник1»да. Футболга 10 ёшимдан қатнашишни бошлаганман. Бизнинг Спутникда иккита мактаб бор: 2-ва 3-. Авваллари 2-мактабда кечки соат бешдан футболсевар болалар йиғилишардик. Жамоаларга бўлиниб олардик-да, ким биринчи гол ургунча ўйин давом этарди. Мана шундай ўйинлардан бирида Коростиченконинг эътиборини тортганман. Ўшанда бу инсон мени Сергелидаги 1986 йилда туғилган болалардан иборат жамоага таклиф қилганди. Одил Маҳмудов деган мураббийимиз бўларди. Шундай қилиб, мен футбол билан шуғулланишни бошлаб юборганман. 15 ёшга тўлганимда тарихий ватан - Қозонга кўчиб кетганмиз. Чунки татар миллатига мансубман ва ҳамма қариндошларимиз. Татаристонда яшашарди. Онам, икки синглим билан яшаш тарзимиз қийинлашиб қолганида Қозонга кўчиб кетишга қарор қилгандик. Чунки отам йўқ эди. Қозонда электрон футбол мактабида шуғулланишни бошлагандим. Бу жойдан Руслан Нигматуллин чиққан. Иккиммз бир мураббийда шуғулланардик. Шу тариқа футболчилик фаолиятим аста-сенкинлик билан Россияда бошланиб кетганди. Кейинроқ мини-футболда ўзимни синаб кўришни бошлагандим. Бахтга қарши жиддий жароҳат туфайли фаолиятимни барвақт - 21 ёшимда якунлашимга тўғри келган.

- Билишимизча, футболчи сифатида профессионал даражада тўп сурмагансиз. Ёшлигингизданоқ ўзингизни айнан мураббий сифатида тасаввур қилганмисиз ёки бу қарорга кейинроқ келганмисиз?

- Болалар жамоасини шуғуллантириш орқали мураббийлик ишига кириб келганман. Бу орада институтнинг жисмоний тарбия факультетида ўқиганман. Кейинроқ «Рубин»да суҳбатдан ўтиб иш бошлаганимдан кейин ўрним футболда эканлигини янада теранроқ ҳис қилгандим. Ишни «Рубин» академиясида бошлаганман. Аста-секинлик билан шу соҳада ўсишни, ривожланишни бошладим. Орадан маълум вақт ўтганидан сўнг ЦСКА академиясида ишлаш учун чақиришган. ЦСКА ёшлар жамоасини бошқаришимга ишонч билдиришган ва биз ўз ёш тоифамизда чемпион бўлганмиз. Иккинчи йили кумуш медалга эга чиққандик. Энди эса асосий клубнинг бош мураббийи вазифасида ишлаб келяпман.

- Ҳозир ҳам вақти-вақти билан Тошкентга келиб турасизми? Ўзбекистонда охирги марта қачон бўлгансиз?

- Ҳар йили Тошкентга келиб кетаман. У ерда холам жияним билан бирга яшайди. Ҳозиргача биз яшаган бувимизнинг квартираси сақланиб қолган. Туғилганимда мени туғруқхонадан шу ерга олиб келишган. Ўша жой мен учун куч олиш манбаидек бўлиб қолган. Шу сабабдан ҳам ҳар йили туғилиб ўсган жойимга келиш пайида бўламан. Шундай маҳалларда қадрли инсонлар, ўзим бирга ўсган ошна-оғайнилар билан таниш кўчаларда сайр қиламан. Охирги марта Тошкентда ўтган йил декабрида бўлгандим. Бундан бир йил олдин декабрдаги ташрифим эса Ўзбекистон футбол федерацияси таклифи билан амалга ошганди. Тошкентга Про лицензияси учун ўқиётганларга лекциялар ўқиб бергандим. Яна бир гап: ўтган йили В тоифасида мураббийликка ўқиётганлар учун ҳам лекция ўқиб бергандим. Бу яқин дўстларимдан Дилмурод Ортиқбоевнинг ташаббуси билан амалга ошганди. Ҳозирда у Ўзбекистонда мураббийликка ўқимоқчи бўлганлар мактабини бошқаради. Хуллас, ҳар йили декабрда қадрдон масканимга келиб кетаман. Бу сафар ҳам анъанани давом эттираман, деб ўйлайман.

- Ўзбек футболидаги қайси мураббий ва мутахассисларни яхши танийсиз? Кимлар билан дўстона муносабатларни сақлаб келяпсиз?

- Мураббийлардан шахсан ким билан танишман? Эҳтимол, ўша инсон Тимур Кападзе бўлса керак. У билан Туркияда ташкил қилинган йиғин пайтида танишиб қолгандим. Миржалол Қосимовни ҳам биламан. Унинг ўйинларини қизиқиш билан кузатганман. Бироқ шахсан таниш эмасман. Бошқалар биланми, билмадим, унчалик билмайман.. Ҳа, айтганча, Рўзиқул Бердиевни биламан. Бир сафар у билан аэропортда тасодифан танишиб қолганман. Мен Тошкентдан Москвага, улар эса йиғин учун ўша шаҳарга учишаётганди. Стас Кудряшов билан эса эски қадрдонлардек бўлиб кетганман. Бир неча йилдан бери Туркиядаги йиғинлар чоғида йўлимиз туташиб қолади. Бундай пайтда бемалол, чин юракдан суҳбатлашиш учун имкон топамиз.
Ҳамкасблардан ташқари, собиқ футболчилар билан кўпроқ гаплашамиз. Масалан, Саша Лобанов билан. У ҳам сергелилик болалардан. Баҳодир Сейткамолов биз учун ёши катта ўртоқлардан бири бўлиб қолган. Шунингдек, Россияга бориб қолганлар билан ҳам алоқани сақлаб келаман. Мисол учун, Вадим Романовни айтишим мумкин. У «Динамо С»да ўйнаган. Усмон Қудратович билан ҳам гаплашиб турамиз. Марат Кабаев билан бирга ишлаганман. Тўғри, кўришмаганимизга ҳам анча бўлиб қолди.

- Сиз Денис Коростиченкони ҳам мураббийлар штабига таклиф қилдингиз. Тўғри тушунган бўлсам, сизлар бирга улғайгансиз ва болаликдан бир-бирингизни яхши танийсиз, шундайми?

- Ҳа, Денис Коростиченко менинг штабимда ишлайди. Суҳбатимиз бошида айтганимдек, бу инсон мени Сергелидаги футбол жамоасига чақирган. Ўшанда 9- 10 ёшли болакай эдим. Мана, ўша даврдан бери биз қадрдон бўлиб кетганмиз. Кўриб турганингиздек, танишганимизга ҳам 30 йил бўлибди! Маълум вақт «Рубин» академиясида ҳам биргаликда ишлагандик.

Яқинда Коростиченкони ёшлар жамоасига чақиргандим, энди эса асосий клубда бирга ишлаяпмиз. Ҳа, мен учун бу инсон синалган, қадрдон дўст бўлиб кетган. Футболни жуда ҳам яхши тушунадиган одам. Ишонсангиз, футбол борасидаги қарашларимиз ҳам деярли бир хил! Бундан кейин ҳам йўлни биргаликда босиб ўтмоқчимиз.

- Сиз болалар ва ўсмирлар футболидан тортиб, катта жамоагача бўлган йўлни босиб ўтдингиз. Умуман олганда, сизнинг мураббийлик фалсафангиз қандай?

- Ҳа, мен болалар-ўсмирлар футболидан асосий клуб мураббийлигига қадар бўлган йўлни босиб ўтдим. Фаолиятим босқичма-босқич ривожланиб борди. Футболда қандай босқич бўлса, амалиётчи сингари ҳаммасидан ўтиб бордим, дея оламан. Бежизга амалиётчига ўхшатмадим, ўзимни. Менга кабинетда ўтириб олиб ишлашдан кўра, жонли равишдаги иш жараёни кўпроқ ёқади. 18 йилдан бери, агар адашмаётган бўлсам, майдонда фаол равишда ишлаб келмоқдаман. Менга шуғулланаётган бу ишим жуда ёқади. Фалсафам-ми, иложи борича замонавий футболдаги ҳар қандай янгиликни, ўзгаришларни кузатиб бориш пайида бўламан. Мана, ҳозир фаол тарзда тўпни прессинг остида сақлаб қолиш устида кўпроқ шуғулланяпмиз. Бундай маҳалда тўпни имкон қадар тезроқ рақиб жарима майдонига узатиш керак бўлади. Шунда ҳаракатларимиз янада тажовузкор кўриниш ҳосил қилади. Тўп билан ва тўпсиз самарали ҳаракатланиш менинг асосий тамойилларимдан биридир.

- Келажакда ЦСКА таркибида ўзбек футболчиларини кўришимиз мумкинми? Айни пайтда қайси ўзбек футболчилари эътиборингизни тортмоқда?

- Ўйлашимча, ҳозир Ўзбекистонда ёш иқтидор эгалари кўпчиликни ташкил қилади. Кўзга ташланиб қолганларини кузатиш қизиқарли. Эҳтимол, уларнинг ичидан кимдир ЦСКАда пайдо бўлиб қолар... Аммо айни пайтда аниқ кимнидир кузатаётганимиз йўқ. Балки келажакда шу иш содир бўлиб қолиши ҳам мумкин. Чунки Файзуллаев ўзидан бу ерда яхши ном қолдира олган. Ўзбек футбол бозори биз учун қизиқарли. Фурсати келиб у ёки бу футболчи бизда қизиқиш уйғотса, албатта, ўрганишга киришамиз.

- ЦСКА — совринларга бой, катта амбицияларга эга клуб. 40 ёшли мутахассис учун бундай қадам катта таваккалчиликми, қўшимча босимми ёки аниқ қўйилган мақсаднинг натижасими?

- Аввало, бу зиммамга катта масъулият юклайди. 40 ёшингда ЦСКАдек катта клубни бошқариш - бу ҳазилакам иш эмас. Мана шундай имкониятни ҳавола этган раҳбарларимиздан жуда миннатдорман. Ўз навбатида клубимиз ишқибозларини ҳам айтиб ўтмасам бўлмайди. Раҳбарият ва улар менга шу постни эгаллаб туришимга сабабчи бўлиб туришибди. ЦСКАда 8 йилдан бери ишлаб келаётганим учун бу менга қадрдон жамоадек бўлиб қолган. Ўз ўрнида бош мураббий сифатида билдирилган ишончни клуб билан юқори натижаларга эришиш орқали оқлашни истайман.

- Ўзбек футболи ва Ўзбекистон чемпионатини кузатиб борасизми?

- Ростини айтсам, Ўзбекистон футболини кузатиб боришга вақт ажрата олмайман. Лекин Олег Зотеев билан гаплашганимда у мени охирги янгиликлардан хабардор қилиб туради. Зотеев ҳам менинг дўстларимдан. Бу ерда Олег Владимировичдан ҳам Ўзбекистон футболидаги янгиликларни эшитиб тураман.

- Ўзбекистонда ЦСКА мухлислари жуда кўп. Айниқса, Игдисамов ва Коростиченко асосий жамоа билан ишлаш имкониятига эга бўлганидан сўнг мамлакатимизда клубга бўлган қизиқиш янада ортди. Ўзбек мухлисларининг қўллаб-қувватлаши ва эътиборини қанчалик ҳис қиляпсиз?

- Ҳа, Ўзбекистондан бўлган ишқибозларнинг қўллаб-қувватлашларини ҳис қилиб турамиз. Айниқса, ижтимоий тармоқ орқали бизга жуда кўп ёзишади. «Сергели-1986» да бирга ўйнаган йигитларимиз бу масалада илғор. Бизни таниган-билганлар жамоадаги ишимиз билан қизиқиб, мухлислик қилиб келишларини айтишади. Уларнинг далдасини ҳис қилиш жуда ҳам ажойиб! Қисқа айтганда, ўзбек футболи билан алоқамиз жойида.

- Сизга ЦСКАда катта муваффақиятлар тилаймиз ва сизнинг раҳбарлигингиз остида клуб кўплаб совринларни қўлга киритишини истаб қоламиз. Интервью учун ташаккур!

- Яхши тилаклар учун, саволларингиз учун катта раҳмат. Соғ бўлинг!