«Хоразм» клуби ёзги трансфер вақтида таркибда ўзгаришларни амалга оширди. Хусусан, жамоага «Cўғдиёна»дан Суҳроб Иззатов таклиф қилинди. Яқинда футболчи Tribuna.uz учун эксклюзив интервю беришга қарор қилди.
- Суҳроб, аввало суҳбатимизни «Хоразм»нинг иккинчи даврадаги иштироки билан бошласак. Айтингчи, жамоанинг ҳозирги вақтда қайд этаётган натижаларига муносабатингиз қандай?
- Тўғриси, иккинчи давра жамоамиз учун осон кечмаяпти. Буни турнир жадвалидаги ҳолатимиздан ҳам билиш мумкин. Лекин олдиндаги баҳслар ва жамоамизнинг имкониятларидан келиб чиқиб айтсам, биз лигада қолиш вазифасини удаллай оламиз. Бизда яхши жамоа шаклланган. Ўйлайманки, қолган турларда янада яхшироқ натижалар қайд этиб, ўз олдимизга қўйилган вазифани уддасидан чиқа оламиз.
- 8 та ўйинда жамоа лигада қолиш вазифасини уддасидан чиқишига ишонасизми?
- Ҳа, албатта. Биласизми, олдинда турган ҳар бир беллашув биз учун финалга тенг бўлади. Такрорлайман, лигада қолишга жамоамизнинг кучи ва имкониятлари етади. Ҳали ҳаммаси олдинда. Асосийси, бўлажак баҳсларга яхшироқ тайёргарлик кўришимиз керак. Вазифани ҳам уддасидан чиқиш мумкин.
- «Cўғдиёна»да ажойиб мавсумларни ўтказдингиз. У ердаги фаолиятингизни қандай хотиралар билан эслайсиз?
- Жиззахдаги фаолиятим ўртача бўлди деб ўйлайман. Чунки хатолар бўлди, айримлар баҳсларда кўнгилдагидек кечди. Шу сабаб умумий қилсам, ҳаммаси ўртача якунланди. Умуман олганда жамоани фақат яхши хотиралар билан ёдга оламан.
- «Хоразм»даги келгусидаги тақдирингиз қандай кечади?
- Клуб билан 2027 йилнинг охиригача бўлган муддатда шартномам бор. Аввало жамоани лигада олиб қолиш ҳақида ўйлашимиз керак. Вазифани уддасидан чиқсак, кейинги бошқа масалалар ҳақида ўйлаш мумкин. Ҳозир чалғишни истамайман ва жамоани лигада қолишига боримизни бермоқчимиз.
- Бу йилги ўзингизнинг иштирокингиз қандай бўляпти?
- Бу йилги ўйинга келадиган бўлсак, ўйинимдан 100 фоиз қониқиш ҳосил қилмаяпман. Чунки турли жароҳатлар бўлди. Қолаверса, мавсум ўртасида янги жамоага мослашиш жараёни ҳам осон бўлгани йўқ. Қисқаси, мавсумдан кўнглим тўлмаяпти. Аммо қолган баҳсларда жамоамга ёрдам бериш учун ҳаракат қиламан.
