Сервер Жепаров: «Бир сонияга бўлса ҳам мураббийлик ишини тўхтатганим йўқ»

Ўзбек футболининг таниқли шхсларидан бири, барча мухлисларнинг севимли футболчиларидан бири бўлган Сервер Жепаров ҳақида сизларга ортиқча таърифнниг ҳожати бўлмаса керак. Футболчиликдан кейин мураббий сифатида гавдаланаётган Жепаров Tribuna.uz нашрига интервю берди.

- Сервер Решатович, ҳозирда нима билан шуғулланяпсиз?

- Бош мураббий сифатида ва «Оқтепа» футбол клубида инвестор бўлиб ишлаяпман. «Оқтепа» айни пайтда Ўзбекистон биринчи лигасида иштирок этмоқда.

- Бироқ сўнгги пайтларда бу йўналишда сизни унчалик фаол кўрмаяпмиз. Шу билан бирга, сиз хорижда ҳам мураббийлик амалиётини ўтагансиз. Нега ҳозир сизни мураббийлик соҳасида фаол ишлаётган ҳолда кўрмаяпмиз?

- Бир сонияга бўлса ҳам мураббийлик ишини тўхтатганим йўқ. Ўртада мураббийлик фаолиятимда қисқа танаффус юзага келди. Лекин шунда ҳам ундан ўзим учун фойдали нарсани олдим. Клубларга малака ошириш учун бордим. Академияларни кўрдим, мураббийлар билан суҳбатлашдим. Селекционерлар, таҳлилшунослар билан гаплашдим. Таҳлилшунослик борасида курсларни тамомладим. Шунингдек, «Қайрат» ФКда Қурбон Бекиевич Бердиев; «Сочи» ФКда Владимир Валентинович Федотов; «Локомотив» ФКда немис мутахассиси Йозеф Циннбауэр; «Динамо» ФКда Марцел Личка (Чехия); «Рубин» ФКда Рашид Маматқулович Рашидов; «Торпедо» ФКда Олег Григоревич Кононов каби мутахассисларнинг иш услубларини ўргандим. Бир йилдан ошиқроқ УЕФА «А» лицензияси учун ўқидим ва муваффақиятли тамомладим. Ваҳоланки, менда ОФКнинг «ПРО» лицензияси ҳам бор. Икки йил мобайнида менга Ўзбекистон Суперлигасидан аниқ таклифлар келиб тушмади.

- Футбол майдонидан ташқарида ҳам сизга «Сервер Решатович» деб мурожаат қилишадими ёки кўпроқ шунчаки «Сервер» деб чақиришадими? Умуман, сизга ҳурмат юзасидан исм-фамилиянгиз билан эмас, отангизнинг исми билан мурожаат қилишларига кўникиб қолганмисиз?

- Мураббий бўлиб ишлар экансан, сенга исмингни ва отангнинг исми билан мурожаат қилишлари қулоққа жуда ёқимли чалинади. Шундай экан, бундай чақирувларга аллақачон кўникиб кетганман.

- Мураббий сифатидаги энг катта орзуингиз нима?

- Ўз олдига яхши мақсадлар қўйган клубни бошқариш, ғалабалар қозониш, турнирларни ютиш, чемпионатларда муваффақиятга эришиш, терма жамоани ҳам бошқариш ва у билан жаҳон чемпионатига чиқишни орзу қиламан!

- Ўғлингиз Раул Жепаров ҳозир «Динамо»да ўйнаяпти. Унинг ҳар бир учрашувини кузатиб борасизми? Унинг ўйинини қандай баҳолайсиз?

- Уни расман табриклашни истайман. Суперлигада 19 ёшида дебют ўтказиш осон эмас. Мен унинг ҳар бир учрашувини кузатиб бораман. Таъкидлаш керакки, у дебют учрашувида ўзини йўқотиб қўймади. Барча ўйинларда интизомли ҳаракат қиляпти, майдонда катта ҳажмда ишлаяпти.

Менга энг кўп ёқадиган жиҳати — унинг олдинга узатмалари. Ҳаводаги тўплар учун курашда ҳам ўзига ишончли ҳаракат қилади ва кўп ҳолатларда дуэлларда ғолиб чиқади. Унинг ҳали олдида катта йўл бор. Унга фақат омад ва муваффақият тилайман.

- Ўғлингиз «Динамо»га қандай ўтиб қолди? Бу борада Вадим Абрамов билан шахсан гаплашганмисиз?

- Уни ўзим ишлаётган «Оқтепа» клубида илғашди. Мен ўғлимни «Бунёдкор»дан бир йилга ижарага олгандим. Чунки у жамоада етарли даражада ўйин амалиётига эга бўлмади. Биринчи лиганинг навбатдаги турида Самарқандда «Шердор»га қарши ўйнадик. Ўша жойда ўринбосарлар мураббийи Рафаэль Валеревич Баласанян уни илғаб қолди. Айтишим кераккки, бу пайтгача ҳам Баласанян ўғлимни танирди. Учрашувдан сўнг у мендан ўғлимни ўринбосарлар жамоасига берасизми, деб сўраб қолди. Мен бир шарт билан: «Динамо»нинг асосий таркиби билан шуғулланиш учун шароитлар яратиб берсагина рози бўлишимни айтдим. Шунда у Вадим Карленович билан бу масалада гаплашди. Тошкентдаги йиғин чоғида Карленович билан учрашдим. Шундан сўнг ўғлимнинг «Динамо» клубига ўтиши юз берди. Карленович Раулни кўриб чиқишини айтди. Кейин эса уни «Динамо»га мос келади, деган хулосага келди. Шу тариқа Раулнинг Самарқанд «Динамо»сига ўтиши амалга ошди.

- Нега ўғлингизга айнан Раул деб исм қўйгансиз? Бу «Реал Мадрид» сафида ўйнаган машҳур Рауль Гонсалес билан боғлиқми?

- Футболчи бўлганим сабаб, исми ҳам футболчиларга хос бўлишини хоҳлаганман.

- Ўзбекистон миллий жамоасининг Эрон устидан 3:1 ҳисобидаги ғалабаси ҳақида нима дея оласиз?

- Ўйин чоғида йигитлар ўзларини аъло даражада намойиш қилишди. Устига-устак рақиб кўпроқ хатога йўл қўйди. Бизнинг йигитлар эса бундай хатолардан самарали фойдаланиб қолдилар.

- Каннаваро таркибни ёшартиряпти ва жиддий ротацияларни амалга оширяпти. Шу билан бирга, бир қатор етакчи футболчилар терма жамоага чақирилмади. Бундай қарорларга муносабатингиз қандай?
- Бундай амалиётни терма жамоада ишлаётган кўплаб мураббийлар қўллашади. Каннаваро ҳам ўзбек футболининг келажаги ҳақида ўйлагани боис таркибга кўпроқ ёшларни жалб этмоқда. Бундай ёшлар ўз навбатида тажрибали ўйинчилар билан маҳоратларини ошириш учун етарлича кўникма ҳосил қилмоқдалар. Бундай иш орқали яхши футболчиларни етиштириш ва уларнинг олдига юқори мақсадлар қўйилган вазифаларни бажаришни белгилаш керак.

- Осиё ўйинларида олимпия жамоамиз ярим финалда Японияга қарши майдонга тушади. Имкониятларимизни қандай баҳолайсиз?

- Мен бу йигитларни ўсмирлар жамоасида ишлаб юрган пайтимда селекция орқали йиғганман. Кўплаб болаларнинг потенциали ва майдонда қандай ишлашларини яхши биламан. Уларда нафақат Японияни, балки бутун турнирни ютиш учун ва мамлакатимизга медаллар билан қайтиш учун яхши имконият бор.

- Сиз икки марта Осиёнинг энг яхши футболчиси деб топилгансиз. Бу мукофотларни олишингизни олдиндан кутганмидингиз? Иккинчи марта бу совринни қўлга киритиш биринчисига қараганда қийинроқ бўлганми?

- Бу мукофотларни қўлга киритишимни олдиндан кута олмаганман. Лекин ҳар доим ғалаба қозонишни истаганман. Бундай хоҳиш болалигимдан бор. Болалик чоғларимда ҳам ўйнасам ютқазишни жуда ёмон кўрардим. Ҳар бир учрашувни ютишга ва ўзимни кўрсатишга интилганман. Шундай бўлдики, ташкилотчилар менинг барча сайъ-ҳаракатларимни кўрдилар ва ўзим ҳақимдаги ҳамма маълумотларни тўплашга тушдилар. Шу сабаб энг яхшиси сифатида тан олинганман!

- Сиз Ўзбекистонда ҳам, Осиёнинг турли клубларида ҳам фаолият юритгансиз. Қайси клубда профессионалликни энг юқори даражада ҳис қилгансиз?

- Мен Корея клубларида юқори профессионаллик даражасини ҳис қилганман. Хусусан, «Сеул», «Сеонгнам»да фаолият юритганман.

- Футболчилик фаолиятингизга энг катта таъсир кўрсатган мураббий ким бўлган? У сизга бошқа мутахассислар ўргатмаган нимани ўргатган?

- Ўзим билан ишлаган барча мураббийлардан миннатдорман. Ҳар биридан энг яхши сабоқларни ва жиҳатларни олишга ҳаракат қилганман. Фаолиятим давомида кўплаб мураббийлар менга устозлик қилишди. Улар ўз навбатида қўлларидан келган нарсани менга ўргатишди. Айниқса, Виктор Романович Жалиловни алоҳида кўрсатиб ўтишим керак. Айнан у киши туфайли олий лигага чиқиш учун менда имконият юзага келган. Афсус, энди бу инсон орамизда йўқ. Охирати обод бўлсин.

- Жаҳон чемпионатидан кейин футболимизда қандай ўзгаришларни кўряпсиз? Бизда пасайиш кузатиляптими ёки аксинча, ривожланиш давом этяптими?

- Инфратузилмалар ривожланяпти, янги академиялар барпо қилинмоқда. Терма жамоалар учун янги марказ қуриб битказилди. Футболнинг ривожи учун қилиниши керак бўлган барча шарт-шароитлар муҳайё қилинмоқда. Ўзбекистон чемпионатига келсак, жаҳон рейтингида Суперлигамиз 93-ўринга кўтарилди ва олдингига нисбатан уч поғона юқорилади. Осиёда эса бизнинг биринчилик топ 15 таликка киради, бу ҳақиқатга яқин ва мен буни тасдиқлайман. Ўйинларни томоша қилиш тобора қизиқарли бўлиб боряпти, айниқса учрашувларда стадионлар мухлислар билан тўлаётгани қувонарли. Айниқса, бу борада «Андижон» футбол клуби фанатларига алоҳида миннатдорлик билдириб ўтмоқчиман.

- Айни пайтда қандай режа ва мақсадларингиз бор?
- Ҳозир менинг жамоамда пролигага чиқиш вазифаси қўйилган ва биз бунинг устида ишлаяпмиз. Айни чоғда мусобақа жадвалида иккинчи поғонани банд этиб турибмиз. Кейин пулка бошланади. Шу йўл орқали пролигага чиқиш масаласи ҳал қилинади.