УEФА Миллатлар лигасининг 2026/27 йилги мавсуми гуруҳ босқичи якунларига кўра, Швейцария, Шимолий Ирландия, Австрия ва Швеция А лигасига тўғридан-тўғри кўтарилди. Ушбу жамоалар ўз гуруҳларида биринчи ўринни эгаллади ва келаси мавсумда B лигасига тушиб кетган миллий жамоаларнинг ўрнини эгаллайди.
А лигасини тарк этиши аниқ бўлган икки жамоа — Туркия ва Чехия. Қолган тўртта ўрин учун саккизта миллий жамоа плей-офф баҳсларида қатнашади. Улар орасида А лигасининг энг ёмон натижа кўрсатган учинчи ўрин эгалари Дания ва Хорватия, тўртинчи ўринларни эгаллаган жамоалар орасидаги энг яхши икки натижа соҳиби Сербия ва Уэлс, шунингдек, B лигасида иккинчи ўринни олган Словения, Венгрия, Ирландия ҳамда Босния ва Ҳерсеговина бор.
Плей-офф босқичи қуръаси 20 ноябр, жума куни ўтказилади. Ушбу босқичнинг дастлабки баҳслари 2027 йил 25–27 март кунлари, жавоб беллашувлари эса 28–30 март кунлари бўлиб ўтади.
Маълумот учун, Миллатлар лигасининг амалдаги ғолиби Португалия ҳисобланади. Португалия миллий жамоаси аввалги мавсум финалида Испанияни асосий вақтда 2:2 ҳисобидаги дурангдан сўнг пеналтилар сериясида 5:3 ҳисобида мағлуб этган.
Эслатиб ўтамиз, Миллатлар лигаси натижалари 2028 йилги Европа чемпионатига саралаш жараёни билан ҳам боғлиқ.
Мухлислар бу янгиликни Telegram’да муҳокама қилмоқда
Изоҳлар Telegram’да очилади