«Ливерпул» бош мураббийи Арне Слот жамоа ҳужумчиси Муҳаммад Салоҳнинг «Галатасарой»га (4:0) қарши ўйинда жароҳат олганини маълум қилди.
33 ёшли вингер Чемпионлар Лигаси 1/8 финалидан ўрин олган баҳснинг 74-дақиқасида алмаштирилди.
Нидерландиялик мутахассис бундай жароҳат Салоҳ каби чидамли футболчи учун ноодатий эканини тан олди, шунингдек, мисрлик футболчининг АПЛ доирасидаги «Брайтон»га қарши ўйинга бормаслигини тасдиқлади.
«Чиндан ҳам бу — ноодатий ҳолат. У эртага ўйнай олмайди. «Ливерпул» ва биз учун яхши томони шундаки, олдимизда халқаро ўйинлар учун танаффус бор. Бу эса Миср учун ёмон, чунки у миллий жамоага бора олмайди.
Шунингдек, Муҳаммаднинг аввалги ҳолатларини ҳисобга олиб, бошқа футболчиларга қараганда тезроқ тикланишига умид қиляпмиз, чунки у ўз танасига жуда яхши қарайди. Тарих шуни кўрсатадики, у айрим футболчилардан тезроқ майдонга қайтиши мумкин.
«Брайтон»дан сўнг навбатдаги ўйинимизгача икки ҳафта вақт бор. Унинг шу вақт ичида тикланиб олишига умид қиламиз», – дея Слотнинг сўзларини келтиради Goal.
