Аргентина миллий жамоаси бош мураббийи Лионел Скалони яримҳимоячи Леандро Паредеснинг узоқ муддатли дисквалификацияси ҳақида ва унинг жамоадаги ўрни ҳақида гапириб ўтди.
«Мен Леандро билан суҳбатлашганим йўқ, аммо у миллий жамоа тарихидан ўрин эгаллаб улгурган футболчилар сирасига киради. Биз уни қадрлаймиз, бу жуда буюк футболчи. Эшиклар у учун доимо очиқ», - дея бош мураббий Скалонининг сўзларидан иқтибос келтиради Tyc Sports.
Эслатиб ўтамиз, Паредес АҚШ, Канада ва Мексика мезбонлигида ўтган жаҳон чемпионати-2026 финалида Испанияга қарши баҳсдаги ҳаракатлари туфайли ўнта ўйинга дисквалификация қилинган эди. Ҳал қилувчи баҳсда Лионел Месси бошчилигидаги аргентиналиклар Испанияга қўшимча бўлимларда имкониятни бой бериб қўйишди (0:1). Ғалаба голига Ферран Торрес муаллифлик қилган эди.
