«Манчестер Юнайтед»нинг собиқ ҳужумчиси Луи Саа Майкл Кэррикнинг бош мураббийлик лавозимидан озод этилишига муносабат билдирди. Мутахассис билан хайрлашиш 12 ноябр куни расман эълон қилинган эди.
«Бу жуда оғриқли. Бундай вазиятга тушиб қолганимиз мени ажаблантирмайди. Айниқса, гап клуб афсонаси ҳақида кетаётганини ҳисобга олсак, бу жуда оғир. Натижалар йўқ, турнир жадвалида эса ўзимиз муносиб бўлган ўринда эмасмиз. Албатта, ўзгаришлар зарур эди, бироқ бундай қарорни ёздаёқ қабул қилиш керак эди. Раҳбариятда Майкл Кэррик билан шартномани узайтириш ва сифатли трансферларни амалга ошириш имконияти бор эди. Аммо трансфер бозорида жуда ёмон ишлашди.
Мухлис ва собиқ футболчи сифатида бундан жуда хафаман. Ҳар сафар кейинги қадам тўғри бўлишига умид қиласан. Нима бўлганини аниқ билмайман, аммо директорлар кенгаши қарор қабул қилиши керак эди. Гарчи бунгача ҳам бир нечта жиддий хатоларга йўл қўйилган бўлса-да. Ўтган мавсум жамоа яхши ўйнади, аммо ҳозир вазият бошқача. Олдинда Чемпионлар лигаси бор эди ва дастлабки баҳсларданоқ натижа кўрсатиш керак эди. Бироқ бундай бўлмади.
Ўшандаёқ ишлар осон кечмаслиги аён эди. Трансфер бозорида аввалги хатолар такрорланмаслигига жуда умид қилгандим. Кучли, жисмонан бақувват ҳужумчи ёки ҳар ҳафта жароҳат олмайдиган ҳимоячи сотиб олишлари керак эди. Акс ҳолда, бу ҳалокат сари тўғридан-тўғри йўл. Майкл ушбу лавозим учун муносиб инсон бўлганми ёки йўқми, буни ҳеч қачон билмаймиз. Ҳаммаси унинг ихтиёрига керакли футболчилар берилган-берилмаганига боғлиқ эди.
Нега одамларга инсоний муносабатда бўлиш мумкин эмас? Гап шунчаки мураббий ҳақида эмас, у ҳам тирик инсон. Агар у керакли қўллаб-қувватловни ҳис қилмаса, бу дарҳол ҳаммага сезилади. Бу Майкл хатоларга йўл қўймаган дегани эмас. У ҳам инсон, ҳамма хато қилиши мумкин. Аммо унга зарур ёрдам кўрсатилган деб ўйламайман», — дея Саанинг сўзларини Sky Sports келтирмоқда.
Маълумот учун, Саа 2004–2008 йилларда «Манчестер Юнайтед» сафида тўп тепган.
Эслатиб ўтамиз, «МЮ» Кэррик билан хайрлашганини 12 ноябр куни расман эълон қилди.
