Франциялик собиқ яримҳимоячи, ҳозирда футбол таҳлилчиси сифатида фаолият юритаётган Жером Ротен Зинедин Зидан ва Луис Энрикенинг Усмон Дембеле ҳақидаги фикрларини танқид қилди. У мураббийлар футболчини ҳимоя қилишга ҳаддан ташқари берилмаслиги, унинг ўйинидаги камчиликларни ҳам очиқ тан олиши кераклигини таъкидлади.
Дембеле Франция миллий жамоасининг сўнгги баҳсларида кутилган даражада ўйин кўрсата олмади. У Белгия билан баҳсда марказий ҳужумчи ва ўнг қанотда ҳаракат қилганида ҳам ўз имкониятларини тўлиқ намойиш эта олмади. Шу билан бирга, футболчи мавсум бошида «ПСЖ» сафида ҳам энг яхши спорт формасига чиқа олмаган эди.
2025 йилги «Олтин тўп» соҳиби ушбу мавсумда Париж клуби сафида барча мусобақаларда еттита баҳсда қатнашиб, иккита гол ва тўртта голли узатмани амалга оширган.
Италия билан 1:1 ҳисобидаги дурангдан кейин Зинедин Зидан футболчини ҳимоя қилиб, унинг бошланғич таркибда майдонга тушган икки ўйинидаги ҳаракатларидан мамнун эканини айтган.
«У бошланғич таркибда майдонга тушган икки баҳсда яхши ўйнади, деб ҳисоблайман. Унинг майдондаги ҳаракатларидан мамнунман. Усмон одатдагидек ўйнайди, кўп ҳаракатланади ва тез-тез ўз позициясини тарк этади. Биз учун муҳими ҳам шу. Кўпинча голларга эътибор қаратамиз, аммо мен вазиятга бошқача қарайман. Уни кўп нарсада айблай олмайман», — деган Зидан.
Луис Энрике ҳам Дембеле ўйинини юқори баҳолади. «ПСЖ» бош мураббийи матбуот анжуманида футболчининг миллий жамоа сафидаги ўйинларини «таъсирли» деб атади.
«Менимча, у одатдагидек ажойиб ўйнади. У ўзгача футболчи. Унинг майдондаги ҳаракатларини кўриб, хотиржам бўлишингиз мумкин. У доимо ўз қобилиятларини намойиш этишга, зарба беришга ва жамоадошлари билан комбинациялар ташкил этишга тайёр. У жуда яхши ўйнади», — деди Энрике.
Бироқ Ротен бу фикрларга қўшилмади. RМC радиоси эфирида гапирган собиқ футболчи мураббийларнинг мақтовлари майдондаги ҳақиқий ҳолатга мос келмаётганини таъкидлади.
«Биз Зидан ҳақида гапиряпмиз. У ҳаммаси яхши бўлганини, ҳатто қанот ҳимоячилари ҳам яхши ўйнаганини айтмоқда. Йўқ, ҳамма нарса ҳам яхши бўлгани йўқ. Яхши чиққан жиҳатлар ҳам, муваффақиятсиз томонлар ҳам бор. Бизни аҳмоқ деб ўйламанг, бизга шунчаки очиқ гапириш керак», — деди Ротен.
Унинг фикрича, Дембеле каби футболчига мураббийлар уни мақтаётганини эшитишдан кўра, ўз ўйинини холис баҳолаш муҳимроқ.
«Сизнингча, Усмон Дембеле миллий жамоа мураббийи ундан мамнун эканини ва Луис Энрике уни ажойиб деб ҳисоблашини эшитишга муҳтожми? Футболчи ҳатто қизиш машқлари вақтидаёқ ўзини руҳан ўйинга тайёр ҳис қилаётганини, баҳсга қанчалик жалб этилганини ва яхши ўйнай олишини сезади», — дея қўшимча қилди у.
Ротен футболчининг ҳозирги ҳолатини ҳам алоҳида қайд этди.
«Шуни тан олиш керакки, унинг «ПСЖ»даги мавсумни бошлаши яхши бўлмади ва бу унинг истеъдоди даражасига мос келмади. Франция миллий жамоаси сафида ўтказган тўртта баҳси ҳам у намойиш эта оладиган даражадан анча паст бўлди. Ахир у «Олтин тўп» соҳиби», — деди таҳлилчи.
Шу билан бирга, Ротен Дембеле ҳақидаги якуний ҳукмни чиқаришга шошилмаслигини айтди. У футболчининг салоҳиятига ишонишини, аммо ҳозирги давр унинг учун мураккаб кечаётганини таъкидлади. Таҳлилчи мураббийлар футболчининг яхши жиҳатларини эътироф этиш билан бирга, камчиликларини ҳам очиқ айтиб, уларни кейинги йиғинларда тузатиш устида ишлашларини билдириши мумкинлигини қайд этди.
Маълумот учун, Дембеле 2025 йилда «Олтин тўп» мукофотини қўлга киритган.
