«ПСЖ» ва «Монако» яримҳимоячи Магнес Аклиушнинг трансфери бўйича тўлиқ келишувга эришди.
Инсайдер Саша Таволерининг хабар беришича, парижликлар футболчи учун 50 миллион евро тўлайди. Айнан шу маблағни «Монако» музокаралар бошланганидан буён талаб қилиб келаётган эди.
Аввалроқ хабар қилинганидек, Аклиушнинг ўзи ҳам «ПСЖ» билан шахсий шартнома шартлари бўйича тўлиқ келишиб олган. Яқин кунларда трансфер билан боғлиқ барча расмий жараёнлар якунланиши кутилмоқда.
Магнес монегасклар академияси тарбияланувчиси ҳисобланади. У 2022 йилнинг ёзидан буён клубнинг асосий жамоаси сафида тўп тепиб келади.
Ўтган мавсумда ярим ҳимоячи барча турнирлар доирасида 43 та учрашувда иштирок этиб, 7 та гол урди ва 11 та голли узатмани амалга оширди. Унинг «Монако» билан амалдаги шартномаси 2028 йилнинг ёзига қадар мўлжалланган.
