Брюссел прокуратураси Белгия миллий жамоасининг собиқ яримҳимоячиси Ража Наингголан учун икки йиллик қамоқ жазосини талаб қилмоқда. У халқаро гиёҳванд моддалар савдоси ва пул маблағларини легаллаштиришда гумонланмоқда. Бу ҳақда L’Équipe хабар берди.
Маълум қилинишича, 38 ёшли Наингголан жиноий ташкилотга 105,5 минг еврони легаллаштиришда ёрдам берган. Собиқ футболчи январ ойининг охирида қўлга олинган эди. Ҳозирда у Брюссел шаҳрида суд олдида жавоб бермоқда.
Терговчилар бир неча ой давомида Наингголаннинг белгиялик жиноятчининг укасидан олган пул ўтказмалари билан қизиқишган. Уларнинг умумий миқдори 100 минг евродан ошган.
Дастлаб футболчи бу маблағларни танишига дўстлик юзасидан берган қарзи сифатида изоҳлаган. Кейинроқ эса пуллар ажрашувдан сўнг банк ҳисоблари блокланган дўстига тегишли эканини айтган.
Эслатиб ўтамиз, ҳозирда яримҳимоячи Белгия иккинчи дивизионида иштирок этадиган «Патро Эйсден» клуби аъзоси ҳисобланади.
