«Наполи» трансфер ойнаси очилишига ҳали вақт борлигига қарамай, таркибни кучайтириш бўйича режаларини ишлаб чиқмоқда. Неапол клуби ҳатто январ ойидаёқ амалга оширилиши мумкин бўлган трансфер вариантларини кўриб чиқмоқда.
Calcionapoli1926.it сайти трансферлар бўйича журналист ва инсайдер Экрем Конур маълумотларига таяниб хабар беришича, «Наполи» спорт директори Жованни Маннанинг эътиборини «Тулуза» дарвозабони Гиём Рест тортган.
2005 йилда туғилган франциялик дарвозабон Франция чемпионатида — Лига 1'да ўзини яхши томондан намоён қилмоқда. Ёш футболчининг ўйинлари бир нечта йирик клуб скаутларининг ҳам эътиборини тортган.
Манба маълумотига кўра, Рестга нафақат «Наполи», балки «ПСЖ», «Реал», «Астон Вилла» ва «Ипсвич Таун» ҳам қизиқиш билдирмоқда. Шу сабабли дарвозабоннинг келажаги борасида рақобат юзага келиши мумкин.
Ҳозирча клубларнинг футболчи бўйича расмий таклиф бергани ёки музокаралар бошлангани ҳақида маълумот йўқ. «Наполи»нинг қизиқиши трансфер амалга ошишини англатмайди, бироқ неаполликлар ёш дарвозабонни кузатиб бораётган клублар қаторига қўшилган.
