«Барселона» вингери Ламин Ямалнинг отаси Мунир Насрауи «Олтин тўп» топшириш маросимига учишдан олдин жанжалли вазиятга тушиб қолди. Crónica Global нашри ижтимоий тармоқлардаги гувоҳлар баёнотларига таяниб хабар беришича, воқеа Барселона аэропортидаги кутиш залида жойлашган кафеда юз берган. Можаро шу даражада кескинлашганки, вазиятга фуқаролик гвардияси ходимлари аралашишига тўғри келган.
Келишмовчилик Насрауи курткасини бунга рухсат берилмаган жойга илиб қўйгани сабабли бошланган. Кафе ходималаридан бири ундан буюмни олиб қўйишни сўраган. Гувоҳларнинг айтишича, Ямалнинг отаси бунга кескин муносабат билдирган ва тортишув давомида официантнинг юзига тупурган.
Вазиятни тинчлантиришга уринган гувоҳлардан бири ҳам можаро иштирокчисига айланган. Нашр маълумотига кўра, Насрауи унга зарба берган ва стул билан уришга ҳам чоғланган.
Ҳуқуқ-тартибот идоралари вакиллари етиб келганидан сўнг Насрауи тинчланган. Шундан кейин унга самолётга чиқиш ва Лондон томон учиб кетишга тўсқинлик қилинмаган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади