«Эспанёл» раҳбарияти жамоа бош мураббийи Маноло Гонсалес билан ҳамкорликни тўхтатишга қарор қилди. Клуб расмий сайти мутахассиснинг истеъфога чиқарилганини маълум қилди.
Гонсалес «Эспанёл» Испания кубогининг биринчи босқичида тўртинчи дивизион вакили «Сестао»га мағлуб бўлганидан кейин лавозимини тарк этди. Қўшимча бўлимларга чўзилган баҳсда каталонияликлар 3:4 ҳисобида имкониятни бой берди.
Бундан ташқари, «Эспанёл» Испания чемпионатида ҳам қийин даврни бошдан кечирмоқда. Ла Лиганинг 10-туридан кейин жамоа саккиз очко жамғарган ва турнир жадвалида 18-ўринни эгаллаб турибди.
Маълумот учун, «Эспанёл» 29 октябр куни сафарда «Вилярреал»га қарши баҳс олиб боради. Беллашув Тошкент вақти билан 00:00 да бошланиши режалаштирилган.
