«МЮ», «Бавария» ва «Арсенал» клублари Германиянинг «Ҳоффенҳайм» футболчиси Базуман Турега эътибор қаратди.
Бу ҳақда журналист Экрем Конур хабар берди.
Манбанинг хабарига кўра, немис клуби 20 ёшли футболчиси трансфери бўйича музокараларни 50-55 млн евролик таклифдан бошлайди. Таъкидланишича, музокаралар жараёнида «Ҳоффенҳайм» Туренинг нархини 70-80 млн еврогача кўтариши мумкин. Клуб ўтган қишда ҳужумчи бўйича барча таклифларни рад этди.
Ушбу мавсум Туре барча мусобақаларни инобатга олганда 25 ўйинда майдонга тушди ва 2 та гол уриб, 10 та голли узатма етказиб берди. Футболчининг клуб амалдаги шартномаси 2029 йил ёзигача мўлжалланган.
Transfermarkt портали футболчининг актуал трансфер нархини 35 млн еврога баҳоламоқда.
Миллий терма жамоа сафида Туре 4 та баҳсда иштирок этиб, 2 та гол уришга муваффақ бўлган.
