«Реал» бош мураббийи Жозе Моуринио Мадрид жамоаси футболчилари учун янги интизомий қоидаларни жорий этди.
Португалиялик мутахассис клубда илгари қўлланилган кечикиш учун пул жарималаридан воз кечишга қарор қилди.
The Sun нашрининг хабар беришича, илгари кечиккани учун футболчилар 100 евродан 300 еврогача жаримага тортилиши мумкин эди. Моуринио бундай суммаларни самарасиз деб ҳисоблади ва қаттиқроқ жазони танлади. Эндиликда машғулотга кечиккан футболчи асосий гуруҳ билан машғулотга қўйилмайди, машғулот залига бориб ишлайди ва кейинги ўйинни ўтказиб юборади.
Шунингдек, Моуринио жароҳат олган футболчиларни тиклаш талабларини кучайтирди. Реабилитация «Реал»нинг Валдебебасдаги машғулот базасида ўтказилиши керак. Бундан ташқари, мураббийлар штаби жамоанинг овқатланиши устидан назоратни кучайтирди — футболчилар клуб томонидан ишлаб чиқилган тавсияларга амал қилишлари керак.
