«Ливерпул»нинг собиқ футболчиси Жеймс Милнер клуб академиясига қўшилди. Бу ҳақда The Athletic нашри хабар берди.
Маълум бўлишича, ёзда фаолиятини якунлаган собиқ яримҳимоячи мураббийлар лицензиясини олиш устида ишламоқда. 40 ёшли Милнер УЕФК Про лицензияси учун мерсисайдликлар академиясида тажриба тўплайди.
Норасмий келишув доирасида у муайян бир ёш тоифасидаги жамоани бошқармайди, балки академия мураббийлар штабига ёрдам беради. Ўтган дам олиш кунлари у Киркбидаги машғулот марказида 11 ёшгача бўлган жамоа билан ишлаган.
Эслатиб ўтамиз, Жеймс 2015-2023 йилларда «Ливерпул» жамоасида тўп тепган. Бу клуб сафида барча турнирлар доирасида 332 та учрашувда майдонга тушган. У клуб билан 2019 йилда Чемпионлар лигасида ғолиб чиқди, кейинги йили эса «Ливерпул»га Премер-лига титулини қўлга киритишда ёрдам берди. Унинг ютуқлари қаторида УЕФА Суперкубоги, клублар ўртасидаги жаҳон чемпионати, Англия Кубоги ва Лига кубоги ҳам бор. Футболчи фаолияти давомида «Манчестер Сити», «Астон Вилла», «Нюкасл», «Лидс» ва «Брайтон» жамоаларида ўйнаган.
