«Астон Вилла» клуби қишки трансфер ойнасида «Кристал Пэлас» ҳужумчиси Жан-Филипп Матетани ўз сафига қўшиб олиш имкониятини кўриб чиқмоқда. Бу ҳақда Football Insider маълумотларига таяниб хабар берилмоқда.
Манбага кўра, бир неча ойдан буён франциялик 29 ёшли форвардини кузатаётган бирмингҳэмликлар январ ойида уни трансфер қилишга ҳаракат қилиши мумкин. Клуб ўтган ёзда ҳам футболчи билан шартнома имзолашга уриниб кўрган эди. Аммо клублар трансфер қиймати бўйича келиша олишмаганди. Шунингдек, «Тоттенҳэм» ҳам Матетага қизиқиш билдирмоқда.
Маълумот учун, Матетанинг «бургутлар» билан шартномаси 2027 йил ёзигача амал қилади. У 2021 йилдан бери жамоа шарафини ҳимоя қилиб келмоқда. Ҳужумчи шартномасининг сўнгги йили бўйича клуб билан низога ҳам киришган ва масалани ФИФАга олиб чиққан эди. Бироқ унинг даъвоси қаноатлантирилмаган.
