Аргентина терма жамоаси сардори Лионель Месси Мадрид вилоятидаги ўрмон ёнғинларидан жабрланган ҳудудларни тиклаш учун 80 минг евро хайрия қилди. Бу ҳақда Мадрид автоном ҳамжамияти президенти Исабел Диас Аюсо ўзининг ижтимоий тармоқлардаги саҳифаси орқали маълум қилди.
Аюсонинг таъкидлашича, ажратилган маблағ Мадриднинг Сиерра-Оэсте ҳудудини қайта тиклаш ишларига йўналтирилади. Шунингдек, у Мессига миннатдорлик билдириб, футболчини яқин орада Мадридда кутишаётганини ва маҳаллий аҳоли унга муносиб олқишлар билдиришини қайд этди.
Сўнгги ҳафталарда Мадриднинг ғарбий қисмида юз берган кенг кўламли ўрмон ёнғинлари катта ҳудудга зарар етказди. Расмийлар маълумотига кўра, ёнғин ҳозирда барқарорлашган ва назорат остига олинган бўлса-да, фавқулодда хизматлар ҳанузгача ҳудудда навбатчилик қилиб, ёнғин қайта авж олмаслиги учун хавфли нуқталарни кузатмоқда.
Ҳозирча Пелайос-де-ла-Преса ва Сан-Мартин-де-Валдеиглесиасдаги айрим турар жойларга қайтишга рухсат берилмаган. Шунингдек, Сан-Хуан сув омбори ва Алберче соҳилига олиб борувчи йўллар ёпиқ қолмоқда, айрим автомобил йўлларида ҳам ҳаракат чекланган.
Месси аввал ҳам турли табиий офатлар ва ижтимоий лойиҳалар учун хайрия акцияларида қатнашган. Бу сафарги хайрияси Испаниядаги ёнғин оқибатларини бартараф этиш ишларини қўллаб-қувватлашга қаратилган навбатдаги ташаббус бўлди.
