Лоренте 31 ёшидаёқ Испания миллий жамоасидаги фаолиятини якунлади

«Атлетико» ҳимоячиси Маркос Лоренте Испания миллий жамоасидаги фаолиятини якунлашини маълум қилди.

«Узоқ ўйланишлардан сўнг миллий жамоадаги фаолиятимни якунлашга қарор қилдим. Ҳали ҳам ёш эканимни ва, эҳтимол, ҳамма ишни тўғри давом эттирганимда, бу либосда яна бир неча йил ўйнашим мумкинлигини тушунаман.

Биламан, кўпчилигингиз бу қароримни тушунмаслигингиз мумкин. Албатта, мен ҳам четдан қараганда буни тушунмаган бўлардим. Аммо бу — шахсий қарор, жуда пухта ўйланган ва, энг муҳими, қалбдан қабул қилинган қарор. Жаҳон чемпионатига борган бўлардимми ёки йўқми, ғалаба қозонган бўлардикми ёки йўқми — бу қарорни мен аллақачон қабул қилганман.

Шу йиллар давомида учратган ва оилам ҳамда менга ноёб, унутилмас лаҳзаларни бошдан кечириш имконини берган барча инсонлардан чексиз миннатдорман. Бошдан кечирганларимнинг барчасини хотирамда сақлайман, аммо, энг аввало, сўнгги 52 кунни. Испанияни чўққига олиб чиқиш учун охиригача курашган ажойиб жамоани. Ва бу уддаланди.

Мен учун ўз мамлакатимни ҳимоя қилиш ва бу тарихнинг бир қисми бўлиш катта шараф эди. Барчаси учун раҳмат. Барчангизни қучоқлаб қоламан», — деб ёзди 31 ёшли футболчи.

Лоренте Испания миллий жамоаси сафида жами 27 та ўйин ўтказди ва 2026 йилги Жаҳон чемпионатида ғолиб чиқди.