«Лилл» президенти 6 ойга футболдан четлатилди

Франциянинг «Лилл» клуби президенти Оливие Летанг Лига 1нинг 2-туридан ўрин олган «Пари Сен-Жермен»га (2:2) қарши учрашувдан кейин ҳакамларни танқид қилгани учун олти ойга футболга оид расмий фаолиятдан четлатилди. Бу муддатнинг икки ойи шартли ҳисобланади. Бу ҳақда L’Equipe нашри хабар берди.

Беллашув 28 август куни бўлиб ўтган. 16 сентябр куни Франция Профессионал футбол лигаси (LFP) интизом қўмитаси Летангга 20 минг евро миқдорида жарима солиш билан чекланганди.

Бироқ Франция футбол федерацияси (FFF) Ижроия қўмитаси ушбу жазони «ҳаддан ташқари енгил» деб ҳисоблаб, апелляция берди.

Апелляция натижаларига кўра, функционер олти ой муддатга расмий фаолиятдан четлатилди. Ушбу муддатнинг икки ойи шартли жазо сифатида белгиланди. Аввал тайинланган 20 минг евро жарима эса ўз кучида қолдирилди.