Бугунги кунда барчамизнинг эътиборимиз Ўзбекистон миллий жамоамизнинг ФИФА кунларидаги йиғини ва ўртоқлик ўйинларига ва шу билан бирга Японияда ўтаётган Осиё ўйинларига ҳам қаратилган. Боиси, у ерда олимпия терма жамоамиз иштирок этмоқда ва ярим финалга йўл олди.
Ўзбекистон миллий жамоамиз эса яқинда Фарғонада Эронни 3:1 натижасида доғда қолдирди. Кейинги рақиб эса Сурия.
Табиийки, иккала терма жамоамизнинг ўйинлари мухлис ва мутахассисларнинг нигоҳида бўлиб турибди. Жумладан, иштиёқи баланд, интилувчан, тажрибасини ошириб бораётган мутахассис Сергей Арслонов айнан юқоридаги масалалар бўйича ўз фикрларини билдириб ўтди.
- Сергей Сергеевич, Ўзбекистон миллий жамоасининг Эронга қарши ўтказган ўртоқлик учрашуви сизда қандай таассурот қолдирди?
- Хайрли кун. Миллий жамоанинг бевосита ўйини ҳақида гапирадиган бўлсак, ҳар қандай ҳолатда ҳам ижобий таассурот қолди. Чунки терма жамоанинг ўзида жуда катта ўзгаришлар амалга оширилди.
Энг муҳими, шу пайтга қадар гўёки миллий жамоага чақирилмаган кўплаб бошқа футболчиларга ҳам имконият берилди. Шунингдек, ёш футболчиларда ўзларини кўрсатишлари учун ҳам яхши имконият пайдо бўлди. Менимча, бу ҳам жуда муҳим жиҳат.
Умуман олганда, Каннаваро тутган тамойиллар — яъни бугунги кунда ким тайёр бўлса, ким энг яхши жисмоний ва спорт формасида бўлса, ўша футболчи терма жамоага чақирилиши керак, деган ёндашув — менимча, ҳақиқатдан ҳам тўғри. Яъни, бугунги кунга қараб иш тутиш керак. Бугун ким кучлироқ бўлса, табиийки, ўша футболчи терма жамоа таркибида бўлиши лозим.
- Маҳмуд Маҳамаджонов легионерга айланганидан сўнг миллий жамоадан чақирув олди. У Эронга қарши учрашувда захирадан майдонга тушиб, терма жамоамизнинг учинчи голига ассистентлик қилди. Бу ҳақда қандай фикрдасиз?
- Маҳмудга келсак, унинг учун жуда хурсандман. Нега? Чунки у ҳақиқатан ҳам миллий жамоага чақирилишга муносиб эди. У «Андижон» сафида сўнгги учрашувларда ўзини жуда яхши кўрсатди. Унда ўзига хос ўсиш динамикаси кўзга ташланди. Бу ўсиш нафақат ўйинларда, балки машғулот жараёнида ҳам яққол кўринди. Яъни, у машғулотларда қандай ишлаган бўлса, расмий учрашувларда ҳам шунга яраша ўйнади. Бу эса машғулотлардаги максимал даражадаги ўзини фидо қилиш, бор кучини бериш охир-оқибат расмий ўйинларда ҳам ўзининг ижобий самарасини берганини кўрсатади.
Маҳмуд ҳақиқатан ҳам креатив футболчи. У жамоасининг ҳужум ҳаракатларида жуда фаол иштирок этади. Ҳимояда ўйнаса-да, айтиш мумкинки, у яширин ярим ҳимоячи вазифасини ҳам бажаради. Чунки кўп ҳолатларда ҳужумларга қўшилади ва ҳужумларни ташкил этишда ўзини жуда яхши кўрсатади.
Махамаджонов шартли равишда ўйинни ўз қўлига ола олади, тўп учун курашга кира олади ва чап оёқда яхши кросс узатмаларни амалга оширади. Шунинг учун менимча, у ҳақиқатан ҳам миллий жамоага чақирилишга муносиб эди. Махмуд бу чақирувни оқлади ва бош мураббийнинг ишончини ҳам тўлиқ оқлади.
Нега? Чунки бош мураббий унга ишонч билдириб, таркибда ўйнаш имконияти ва маълум миқдорда ўйин вақти берганида, Маҳмуд ҳақиқатан ҳам бунга муносиб эканини исботлай олди.
- Каннаваро ушбу йиғин учун Ўзбекистон миллий жамоаси таркибига чақирган футболчилар ҳақида қандай фикрдасиз?
- Миллий жамоа таркибига келадиган бўлсак, аввал айтганимдек, менимча, бу нафақат терма жамоа, балки умуман ҳар қандай жамоа учун асосий тамойиллардан бири ҳисобланади: бугунги кунда ким кучли бўлса, ўша футболчи ўйнаши керак.
Яъни, ҳар қандай жамоада — бу клуб бўладими ёки миллий жамоами — ҳамма жойда битта тамойил бўлиши керак: соғлом рақобат тамойили. Бу жуда муҳим. Нега? Чунки шундай соғлом рақобат шароитида футболчилар фақат ўсади ва футболчи сифатида ривожланади. Бу жуда муҳим. Шу боис мен бугунги кунда ким кучлироқ бўлса, ўша футболчиларни танлаш тарафдориман. Менимча, бу ҳақиқатан ҳам жуда муҳим.
Шунингдек, аввал айтган яна бир жиҳатни ҳам таъкидлаш керак: илгари миллий жамоага чақирилмаган футболчиларга ҳам имконият берилгани, бундан ташқари, ёш футболчиларга ҳам ўзини кўрсатиш учун «шанс» тақдим этилгани жуда яхши бўлди. Бу жуда муҳим. Нега? Чунки ҳатто ички чемпионатимизда ҳам миллий жамоада ўйнашга ҳақиқатан муносиб бўлган футболчилар бор.
Мен Каннаваро миллий жамоа эшиклари барча футболчилар учун очиқ, деган тамойилга амал қилаётганидан жуда хурсандман. Бу, биласизми, ўзига хос рағбат, терма жамоага ҳали жалб этилмаган футболчилар учун мотивация вазифасини ўтайди. Табиийки, бу айниқса ёш футболчилар учун катта мотивация.
- Бундан ташқари, Ўзбекистон олимпия терма жамоаси ярим финалга йўл олди ва турнир мезбони — Япония терма жамоасига қарши ўйнайди. Жамоамизнинг имкониятларини қандай баҳолайсиз?
- Олимпия терма жамоаси ҳақида гапирадиган бўлсак, биз Равшан Ҳайдаровни жуда яхши биламиз. У ёшлар терма жамоалари билан ишлаш бўйича катта тажрибага эга бўлган, катта мутахассис. Унинг раҳбарлигидаги ҳар қандай терма жамоа доимо ҳақиқатан ҳам чиройли, мазмунли ва натижадор футбол намойиш этади.
Биз турнир мезбонлари билан тўқнаш келадиган бўлганимизга келсак, менимча, бу ҳолат терма жамоамизни асло қўрқитмаслиги керак. Аксинча, бу янада кўпроқ мотивация, куч ва ишонч бериши лозим. Биз ҳақиқатан ҳам кейинги босқичга ўта олишимиз ва ўтишимиз кераклигига ишонч янада ошиши зарур.
Ёшларимизнинг бугунги ҳолати ва савиясини инобатга олсак, менимча, умуман олганда, Осиёнинг исталган терма жамоаси билан бемалол рақобатлаша оламиз.
Қолаверса, ҳозир биз жаҳон чемпионатига йўлланма олганимизни ҳам ҳисобга олиш керак. Бунга қадар ҳам деярли ҳар бир мусобақада биз фаворитлардан бири сифатида қараб келинганмиз. Менимча, ОФК ҳомийлигидаги мусобақаларда бизнинг йигитларимиз фақат юқори ўринларга даъво қилишга муносиб. Шунинг учун Япония терма жамоаси турнир мезбони эканини инобатга олган ҳолда ҳам биз уларни мағлуб этиб, финалга чиқишга эришамиз, деган умиддаман.
