Кабо-Верде миллий жамоаси сардори Райан Мендеш зўрлашда айбланмоқда.
36 ёшли яримҳимоячига нисбатан айбловни бразилиялик таржимон аёл илгари сурган. Унинг сўзларига кўра, воқеа жорий йилнинг 27 март куни Янги Зеландиядаги меҳмонхоналардан бирида содир бўлган. Ўша пайтда Кабо-Верде жамоаси Чили ва Финландияга қарши ўртоқлик учрашувлари олдидан шу ерда истиқомат қилган.
Аёл Янги Зеландия футбол федерацияси таклифига биноан Кабо-Верде делегацияси учун таржимон сифатида ишлаганини билдирган. Унинг таъкидлашича, Мендеш меҳмонхона хонасига кириб, унга ҳужум қилган, бўғган, урган, тишлаган ва зўрлаган.
Даъвогарнинг сўзларига кўра, воқеадан кейин у танасидаги жароҳатларни суратга олган ва жинсий зўравонлик қурбонларига ёрдам кўрсатувчи тиббиёт марказига мурожаат қилган. Тиббий кўрик давомида танасининг турли қисмларида кўплаб кўкаришлар ва бошқа жароҳатлар қайд этилган.
Globо нашри полисияга тақдим этилган фотосуратлар, тиббий хулоса ва тергов ҳужжатлари билан танишганини маълум қилган.
Янги Зеландия полицияси 10 апрелдан буён ушбу ҳолат юзасидан тергов олиб бормоқда. Ҳуқуқ-тартибот органлари меҳмонхонадаги кузатув камералари ёзувларини йиғган ва суд-тиббий экспертиза якунларини кутмоқда. Шундан сўнг ишни судга ошириш ёки оширмаслик бўйича қарор қабул қилинади.
Шунингдек, жабрланувчи ва унинг турмуш ўртоғи 10 май куни Кабо-Верде футбол федерацияси ҳамда ФИФАга футболчини Жаҳон чемпионатидан четлатиш талаби билан мурожаат қилганини, бироқ ҳозирча жавоб олмаганини билдирган.
Шундай қилиб, ҳозирча бу айбловлар бўйича якуний суд қарори чиқарилмаган ва Райан Мендешнинг айби суд томонидан тасдиқланмаган.
