«Рома» ва Украина миллий жамоаси ҳужумчиси Артём Довбик яна Испания чемпионатига қайтиши мумкин.
Инсайдер Николо Скиранинг маълум қилишича, «Бетис» клуби 28 ёшли форвардга жиддий қизиқиш билдирмоқда. Севиля клуби Довбикни кейинчалик сотиб олиш ҳуқуқи билан ижарага олиш вариантини кўриб чиқмоқда.
Артёмга Испаниянинг яна бир клуби — «Вилярреал» ҳам қизиқиш билдирмоқда. Эътиборлиси, ҳар икки жамоа ҳам ўтган мавсум якунларига кўра, келаси мавсумги Чемпионлар лигаси йўлланмасини қўлга киритган.
Довбик 2024 йилдан буён «Рома» шарафини ҳимоя қилиб келмоқда. У бундан аввал «Жирона» сафида муваффақиятли ўйинлари билан Испания чемпионатида ўз номини танитган.
Украиналик ҳужумчининг Рим клуби билан амалдаги шартномаси 2029 йилга қадар мўлжалланган.
