Иван Пешич: «ОКМКни албатта билардим»

Олмалиқнинг ОКМК клуби ёзги селекцияда таркибига янги қўшиб олган футболчилар орасида хорватиялик легионер Иван Пешич ҳам бор. 1992 йилнинг 6 апрель санасида таваллуд топган футболчи қанот ярим ҳимоячиси саналади. У фаолияти давомида Европани кўплаб клубларида ўйнаган. Бунгача Руминия биринчилигида фаолият кўрсатиб келган.

Исм-фамилияси орқали хорватиялик юлдуз Иван Перишич билан ўхшашиб кетадиган Иван Пешич юртимизга келгач илк интервюсини Tribuna.uz нашрига берди.

- Иван Пешич ва Иван Перишич. Сизлар албатта қариндош эмассизлар. Айтинг-чи, журналистлар сизга фамилиянгиз ўхшашлиги сабабли шу каби саволлар билан мурожаат қилиб туришадими?

- Биз қариндошлар эмасмиз. Аммо гапингиз рост, ҳамкасб футболчилар бу мавзуда мен билан кўп ҳазиллашиб туришади. Лекин ўртамизда ҳеч қандай қариндошлик алоқаси йўқ.

- Ҳаётда Иван Перишич билан қачондир кўришганмисиз?

- Кўришганмиз. Аммо гаплашмаганмиз ва бир жойда ўтирмаганмиз ҳам. У кўпинча чет элда ўйнайди. Мен ҳам 9 йилдан бери Хорватиядан ташқарида тўп тепиб келяпман. Шундай экан, ўзаро кўришиб, гаплашишимиз учун имкониятимиз жуда ҳам кам.

- Ўзбекистонга келгунингизга қадар ўзбек футболи ва ОКМК ҳақида нималарни билардингиз?

- ОКМКни албатта билардим. Ахир Ўзбекистонда шу клуб учун ўйнаган ҳамюртларим бор. Охирги икки йил давомида жамоа яхши натижалар қайд этяпти. 2- ва 3-ўринларни эгаллаб келади. Шунингдек, Кубокни ҳам ютган. Бу клуб ҳақида билганларим.

- ОКМК учун 4 та учрашувда майдонга тушдингиз ва 2 та голга ассист бўлдингиз. Бундан чиқди, ўзбекларнинг «Пешич»и ўзи гол ургандан кўра, шерикларини кўпроқ самарали тўп оширишлари билан хурсанд қиляптими?

- Ҳозирча иккита самарали тўп ошириш бор. Бошланишига ёмон эмас. Ишончим комилки, голлар ҳам бўлади ва жамоага фойда келтиради.

- ОКМК бош мураббийи Миржалол Қосимов ўзбек футболининг тирик афсонаси ҳисобланади. Ўзбекистонга келгунга қадар у хусусида ниманидир эшитганмисиз?

- Ҳа, буни билардим. Клуб директори менга унинг Ўзбекистондаги мақоми тўғрисида гапириб берди. У футболчилик фаолияти билан бундай мақомга муносиб эканлигини исботлай олган шахс.

- Ўзбекча ҳаёт тарзи ва менталитетига кўникма ҳосил қилишингиз қандай кечмоқда?

- Кўникма ҳосил қилиш деярли ўтиб бўлди. Менга бунинг кўп вақт керак бўлмайди. Сабаби, анчадан бери хорижда ўйнаб келяпман ва турли ўзгаришларга ўрганиб кетганман. Шунингдек, қўшни Қозоғистонда ҳам тўп сурдим. Шу боис бу ерда мени нима кутиб турганини деярли билардим.

- Чемпионатимизнинг даражасини қандай баҳолайсиз? Бу ерга келгунингизча биринчилигимиз ҳақидаги тасаввурингиз қай даражада бўлган?

- Менга инфратузилма ёқади. Асосийси, майдонлар табиий. Чемпионат даражаси ҳам яхши. Ўйинлар очиқ ва ҳужумкор футбол асосида кечади. Голлар кўп киритилади. Ўзбеклар орасида эса ёш, иқтидор эгалари талайгина.

- Бу ерга ёлғиз ўзингиз келдингизми ёки оилангиз ҳам сиз билан биргами?

- Ҳозирча бу ерда бир ўзимман. Эҳтимол, сентябрга бориб оиламни бу ерга олиб келсам керак. Тошкент жуда чиройли шаҳар. Мен ҳали бу ерда кўп нарсани кўришга улгурганим ҳам йўқ. Ўйлайманки, оиламдагиларга ҳам шаҳар жуда ёқади, бу аниқ!