«Бунёдкор» клуби узок кутилган ғалабасига эришди. ЖАР стдионида «Бухоро»га қарши бўлиб ўтган учрашувда мезбонлар 2:1 ҳисобида муҳим ғалабани қўлга киритишди. Бу эса Иван Бошковичнинг клубга бош мураббий сифатида қайтганидан кейинги илк ғалабаси бўлди. Матбуот анжуманида у бир қатор саволларга ҳам жавоб қайтарди.
- Барчага хайрли кеч. Жуда хурсандман. Биласизлар, узоқ вақтдан кейин ғалаба қозондик. Бу биз учун жуда кутилган ғалаба эди. Энг муҳими — бугун натижага эришдик. Ўйин олдидан режалаштирган ишларимиз, тактик кўрсатмаларимиз, айниқса, биринчи таймда икки марта гол урганимиз — барчаси ўз самарасини берди, деб ўйлайман. Рақиб ўйинини бузишни мақсад қилгандик. Улар узун узатмалардан кўп фойдаланишини, ҳаводаги курашларни ва иккинчи тўп учун бўладиган курашларни яхши билардик. Шунинг учун бундай ўйинга тайёргарлик кўрдик.
Иккинчи таймда албатта, бироз пасайдик. Ёш футболчилар учун 90 дақиқа давомида шундай юқори интенсивликни ушлаб туриш жуда қийин. Лекин ўз вақтида ўзгаришлар қилдик, захирадан майдонга тушган футболчилар ҳам жамоага ёрдам бериб, ўйин суръатини оширишди.
Менимча, ўйин охиригача рақибда жуда аниқ голли вазиятлар кўп бўлмади. Албатта, иккинчи таймда уларда айрим имкониятлар бўлди. Лекин 80-дақиқадан кейин ўйин охиригача уларда жиддий голли вазиятлар бўлмади. Ҳимояда эса мен энг кўп қўрққан жиҳат — ёш футболчиларнинг яккама-якка курашлардаги ҳаракатлари эди. Лекин улар бугун руҳ ва характер кўрсатишди.
Биз характеримиз эвазига жуда муҳим бўлган уч очкони қўлга киритдик. Бу биз учун катта туртки, ортимиздан эсиб турган шамолдек бўлди. Ҳозир танаффус бор. Кейинги рақибга ҳам яхши кайфиятда тайёргарлик кўрамиз.
«Бунёдкор», мен аввал ҳам айтганимдек, доимо қийин вазиятлардан куч билан чиқиб келган. Ҳозир ҳам клуб ва жамоа жароҳатланган ҳолатда, аммо биз ҳали ҳам тирикмиз ва Суперлигада қолиш учун охиригача курашамиз. Худо хоҳласа, асосий муаммоларимизнинг барчаси ўтиб кетади. Бу ҳолат вақтинчалик.
- Ёш футболчиларингизни атайлаб кузатдим: улар рақибнинг кучли, тажрибали футболчиларига қарши яккама-якка курашларда тенгма-тенг беллашишди. Жуда кўп индивидуал курашларда ғалаба қозонишди, рақибга ҳеч нарса бермади. Қоғоздаги ҳисоб-китобларга кўра, «Бухоро» охир-оқибат ҳисобни тенглаштириши керакдек эди. Аммо бундай бўлмади. Балки асосий жиҳат шу бўлгандир?
- Мен бу ҳақда аввал ҳам айтдим: албатта, биз бунга тайёрланган эдик. Рақибнинг кучини биламиз. Улар ҳаводаги курашларда жуда яхши ўйнайди. Шунинг учун иккинчи тўплар учун курашга, марказда кўпроқ футболчи билан «подбор»ларга ҳам тайёргарлик кўрдик. Биринчи таймда уларга гол ўтказиб юбормаслигимиз ҳам муҳим бўлди. Сиз айтганингиздек, биз кўрсатмалар бердик. Характер ва кучайтириш ҳисобига ҳаракат қилдик. Жами бешта алмаштиришдан фойдаландик.
Футболчилар захирадан тушиб, жамоага қўшилишди. Айниқса, жисмоний жиҳатдан бироз пасайганимизда улар жамоага ёрдам беришди. Менимча, футболчилар муҳим вазиятларда тўғри реакция қилишди. Статистикада бизда мағлуб бўлган яккама-якка курашлар ҳам, ютиб олинганлари ҳам кўп бўлиши мумкин. Лекин энг муҳими — рақиб хавф туғдириши мумкин бўлган зоналарни ўзаро суғурталаш ҳисобига ёпиб турдик.
- Бугун «Бунёдкор»да ҳам голли вазиятлар кўп бўлди, лекин омад етишмади. Ростини айтсам, бугун сизларда, менинг назаримда, бор-йўғи икки-учта аниқ вазият бўлди ва иккитасида дарвозабон гол ўтказди. Сизнингча, бу футболдаги тақдирми? Бугун бундай ҳолатлар жуда кўп бўлди.
- Менимча, бугун «Бунёдкор»ни ҳақиқатан яхши кўрадиган барча инсонлар бир жойга жам бўлди. Академиядаги болалар, барча футболчилар, бутун раҳбарият — ҳамма жамоа билан бирга эди. Менимча, бу ижобий энергия жамоага ўтди. Бугунги муҳит ва ҳамманинг кайфияти бизга ўйинни ютишда ёрдам берди, деб ўйлайман. Энг муҳими, шу тарзда давом этишимиз керак. Менимча, инсон ўз ишини сидқидилдан, бор кучини бериб бажарса, Худо ҳам унга қайтариб беради. Сиз ҳам айтяпсиз: икки зарбадан — икки гол. Шунинг учун мен футболчиларга айтдим: таслим бўлмаслик керак, охиригача ўйнаш ва курашиш керак. Катта меҳнат ва ҳаракат эвазига бу ғалабани қўлга киритдик.
- «Локомотив» билан ўйинда ҳам жамоа барчага қарши рақобатлаша олишини кўрсатганди. Лекин сиз аввал ҳам айтганингиздек, голли вазиятларни якунлашни яхшилаш керак эди. Бугун шу жиҳатни тўғрилай олдингиз. Кейинчалик яна нималарни яхшилаш керак?
- Ҳа, тўғри. Энди олдимизда 20 кун ишлаш учун вақт бор. Кўплаб футболчиларимиз ёш. Уларнинг аксарияти асосий таркиб билан кўп машғулот ўтказмаган. Суперлигада ҳам тажрибалироқ футболчилар билан тенгма-тенг ўйнай оладиган даражада кўп ўйин амалиётига эга эмас. Лекин машғулотлар, айниқса, юқори интенсивликдаги машғулотлар орқали улар ўзларини ривожлантиришади. Кейин мослашув ҳам тезроқ кечади. Назаримда, кейинчалик уларга осонроқ бўлади: тезроқ ўйнаш, курашиш, ғалаба қозониш ва вазиятларга тезроқ реакция қилишни ўрганишади. Футбол ҳам, умуман ҳар қандай спорт ҳам шундай. Шу сабабли ишлаш, меҳнат қилиш керак. Ҳаммаси аста-секин изига тушади.
- Улар ҳали ёш, тажрибаси кам. Ҳозир сиз улардан ниманидир талаб қиляпсиз. Лекин тажрибали футболчилар ва бошқа рақиблар барибир уларни топиб, босим ўтказишяпти. Бундай вазиятда улар билан ишлаш қанчалик қийин?
- Бу бизнинг ишимиз. Улар қанчалик тезроқ нима қилиш кераклигини тушуниб етса ва қанчалик тезроқ ўз зиммасига масъулият олса, шунчалик тезроқ ривожланади. Шунинг учун мен ҳозир улардан масъулиятни ўз зиммасига олишларини кутяпман. Масъулиятни олишсин, интизомга, режимга риоя қилишсин. Шунда, албатта, ривожланишади. Мен бунга шубҳа қилмайман. Албатта, бунинг кўп жиҳати футболчининг ўзига боғлиқ. Уларда ички мотивация бўлиши керак. Ҳозирча улар бу вазифани яхши бажаришяпти.
Менга, мураббий сифатида, ўзидан ўзи талаб қиладиган, ўзи хоҳлайдиган ва масъулиятни зиммасига оладиган футболчи билан ишлаш осон. Уларда футболчилик малакаси бор. Булар академиядан чиққан, тайёргарликдан ўтган, квалификацияли футболчилар. Шу боисдан ҳозир менинг мураббий сифатидаги асосий вазифам — уларнинг қандай ривожланиши ва ўсишини таъминлаш. Бугунги ижобий натижа келажакда янада кучлироқ ишлашимиз учун бизга янги энергия беради. Бу нафақат менга, балки барча футболчиларга тегишли. Ҳозир улар ўзларига ишончлироқ бўлишади. «Локомотив»га қарши ўйиннинг иккинчи тайми ҳам, бугунги учрашув ҳам биз барча рақибларга қарши рақобатлаша олишимизни кўрсатди. Вақт ўтиши билан буни амалга ошириш янада осонлашади, деб ўйлайман. Чунки улар ўз маҳоратини кўрсата олади.
Яккама-якка курашларда кўпроқ ғалаба қозонсак, албатта, учинчи зонага кириш ҳам осонлашади. Бундай голларни ўтказиб юбормаймиз ва тўпни ҳам осонроқ ҳаракатлантирамиз. Чунки агар яккама-якка вазиятларда ғалаба қозона олмасангиз, маҳоратингизнинг ўзи ҳам ёрдам бермайди. Нималар устида ишлаш кераклигини биламиз. Ҳозир Худо бизга шунинг учун 20 кунлик танаффус берди — янада кўпроқ ишлаб, бу муаммоларни яхшилашимиз керак.
- Футбол шунчалик тез ўзгариб кетдими? Ҳозир мана шу ёш йигитлар — ОКМК, «Бухоро», «Навбаҳор» билан ўйинларни кўринг — тажрибали футболчиларга қарши тенгма-тенг кураша олишяпти. «Йигитлар катта эркаклардек курашишди», дейишяпти.
- Агар футболчи малакага эга бўлса-ю, лекин ҳали етарлича ўрганмаган бўлса, унга жисмоний ва психологик жиҳатдан кучайиши учун вақт керак. Куч кейинроқ келади. Малака ва футболчилик тайёргарлиги эса бўлса, биз — мураббийлар учун ишлаш анча осонлашади. Ҳозир биз яхши таҳлил қилдик ва нималар устида ишлашимиз кераклигини биламиз. Сиз «яхши футбол» ҳақида гапиряпсиз. Лекин яхши футбол фақат тўп билан ўйнаш эмас. Яхши ҳимояланиш, рақиб ўйинини бузиш, унга тўп билан ҳаракат қилиш учун вақт ва майдон қолдирмаслик ҳам керак. Биз «Бухоро» футболчиларига қарши айнан шу ғояни қўлладик: уларга тўп билан ўйнаш учун вақт бермаслик, ўз ўйинларини намойиш этишларига йўл қўймаслик. Аввало, узатмалар йўналишини ёпиш, кейин эса иккинчи тўп учун курашиш. Бу борада ишлашда давом этамиз.
Сиз «яхши футбол» дейяпсиз. Ҳозир ёш футболчиларга футболни ўргатиш керак. Фикримча, улардан ҳимояда кўпроқ масъулият олишни талаб қилишимиз зарур. Тўпсиз қандай ҳаракат қилишни ҳам ўрганишлари керак. Фақат тўп ўз ярим майдонига келгандагина эмас. Бугунги натижа ҳам шуни кўрсатди.
Менимча, бугунги ўйин ҳимояда тўғри ҳаракат қилмасдан, рақиб ўйинини бузмасдан очко учун ўйнаш қийинлигини кўрсатди. Бу ҳам катта плюс. Албатта, ўйинда тўпни чиройли айлантириш — бу ҳам яхши футбол. Буни прагматик, яхши футбол деб ҳам аташ мумкин. Футболчини фақат тўп билан эмас, тўпсиз ҳам ўйнашга ўргатиш керак.
- Кейинги турда «Пахтакор» билан ўйнайсизлар. Унга тайёргарлик режангиз борми?
- Ҳа, албатта. Бизда тахминан 19–16 кун вақт бўлади. Асосий таркибнинг деярли 90 фоизи — терма жамоа футболчилари. Улар ёшлар терма жамоасидан ҳам, бошқа терма жамоалардан ҳам қайтиб келишади.
- Ҳозирча тайёргарлик жараёни бўйича қандайдир режангиз борми?
- Албатта, ҳар қандай рақибга тайёрланамиз. «Насаф» билан ўйинга ҳам шундай тайёрланган эдик. Ўшанда ҳам биздан нимадан қўрқяпсизлар, деб сўрашганди. Биз у ерда ҳам жасорат билан ўйнадик. «Насаф»га мағлуб бўлдик, лекин ўша ўйинда синаб кўрган баъзи нарсаларимиз бугун ғалаба қозонишимизга ёрдам берган бўлиши мумкин. Қандайдир ишланма ёки тайёргарлик самараси бўлди.
Энг муҳими, бизда аввал етишмаган агрессивлик ва рақиб ўйинини бузиш жиҳати пайдо бўлди. Мен вазиятни шундай кўряпман. Биз ҳар қандай рақибга тайёрланамиз. «Пахтакор» бўладими ёки бошқа жамоа — фарқи йўқ. Ҳар қандай рақибга қарши яхши тайёргарлик кўриб, муносиб футбол ўйнаш мумкин. Бунинг учун талабларга риоя қилиш керак. Футболда доимо имконият бор. Шунинг учун бу спорт мухлислар учун ҳам, сизлар учун ҳам, мураббийлар учун ҳам қизиқ. Мен футболни шунинг учун яхши кўраманки, майдонга тушиб ўйин бошланмагунча унинг натижасини ҳеч қачон олдиндан билмайсиз», - дея Иван Бошковичнинг сўзларини келтиради Tribuna.uz мухбири.
