2027 йилги Испания Суперкубоги Саудия Арабистони ўрнига Истанбулда ўтказилиши мумкин. Бу ҳақда Испаниянинг Sport нашри журналисти Алфредо Мартинес маълумотларига таяниб хабар берди.
Манбага кўра, турнирни 2027 йил феврал ойининг биринчи ҳафтасида ташкил этиш режалаштирилган. Саудия Арабистонида 7 январдан 5 февралгача Осиё кубоги бўлиб ўтиши сабабли мамлакат Испания Суперкубогига мезбонлик қила олмайди. Шу боис Испания қироллик футбол федерацияси (RFEF) муқобил вариантларни кўриб чиқмоқда.
Шунингдек, турнирнинг ўтказилиш вақтига ҳам ўзгартириш киритилиши мумкин. Аввал у январ ойида ўтказилган бўлса, энди феврал ойининг биринчи ҳафтасида бўлиб ўтиши мумкин.
Нашрнинг таъкидлашича, мусобақага мезбонлик қилиш учун Қатар ҳам даъвогарлардан бири бўлган. Бироқ ҳозирча RFEF учун энг мақбул вариант сифатида айнан Истанбул кўрилмоқда.
2027 йилги Суперкубокда Ла Лига чемпиони «Барселона», вице-чемпион «Реал», Испания кубоги соҳиби «Реал Сосьедад» ҳамда финалчи «Атлетико» иштирок этади. Ярим финалда «Барселона» – «Атлетико», «Реал» эса «Реал Сосьедад»га қарши майдонга тушиши кутилмоқда.
RFEFнинг Саудия Арабистони билан амалдаги шартномаси 2030 йилгача мўлжалланган бўлиб, федерация ҳар йили Суперкубокни ушбу мамлакатда ўтказиш орқали тахминан 51 млн евро даромад олади. 2020 йилдан буён ўтказилган етти мусобақадан олтитаси Саудия Арабистонида ташкил этилган. Фақат 2021 йилги баҳслар пандемия сабаб Испаниянинг Севиля шаҳридаги «Ла Картуха» стадионида бўлиб ўтган.
