Халқаро футбол федерацияси (FIFA) президенти Жанни Инфантино Европа футбол ассоциациялари иттифоқи (UEFA)да ишлаган даврида собиқ севгилисига товон пули тўланишини таъминлаган. Бу ҳақда The Telegraph хабар берди.
Маълум қилинишича, аёл ташкилотнинг маъмурий тизимида ишлаган. Улар ўртасида муносабатлар бошланганидан сўнг у раҳбарлик лавозимига кўтарилган ва унинг маоши 30 фоизга ошиб, 160 минг Швейцария франкига етган.
UEFA собиқ раҳбари Мишел Платини Инфантинонинг ташкилот ходимаси билан эҳтимолий муносабатлари атрофидаги вазиятдан норози бўлган. Натижада аёлнинг ассоциациядаги фаолиятини тўхтатиш ва унга товон пули тўлашга қарор қилинган.
FIFAнинг амалдаги президентининг собиқ ҳамкасблари таъкидлашича, тўланган сумма камида «6 хонали» рақам бўлган. Бундан ташқари, ташкилот аёлнинг ҳар йили 45 минг фунт стерлинг турадиган MBA дастурида таҳсил олиш харажатларини ҳам қоплаган.
UEFA ушбу тўлов амалга оширилганини тасдиқлади ва ходиманинг Инфантино билан ишқий муносабатлари ҳақидаги миш-мишлардан хабардор бўлганини билдирди. Федерацияда замонавий нуфузли ташкилот стандартларига мос келиш учун ички қоидалар «кучайтирилгани» таъкидланди.
Маълумот ўрнида, Инфантино UEFAда 2000 йил август ойидан 2016 йилга қадар ишлаган. У 2009–2016 йилларда бош котиб лавозимида фаолият юритган. 2016 йил феврал ойида эса Жанни FIFA президенти этиб сайланган.
Аввалроқ Инфантино жаҳон чемпионати ҳуқуқларини сотишга рози бўлган мамлакатларга 40 миллион доллардан таклиф қилгани маълум қилинганди.
Мухлислар бу янгиликни Telegram’да муҳокама қилмоқда
Изоҳлар Telegram’да очилади