«Арсенал» клуби собиқ яримҳимоячиси Гранит Жака Лондон клубидаги инқироз даврида бош мураббий Микел Артетанинг қўллаб-қувватлаганини ёдга олди.
2019 йилда футболчи мухлислар билан зиддиятга борганди: ўйинчи алмаштирилаётганда ишқибозлар уни ҳуштакбозлик билан кузатиб қўйган, бунга жавобан Жака кескин муносабат билдириб, футболкасини ечган ва тўғри кийиниш хонасига йўл олган.
«Арсенал»даги дастлабки уч йилимда клубда тўлиқ тартибсизлик ҳукм сурарди. Бизда кўп ўзгаришлар бўлди, жумладан, Арсен Венгер билан боғлиқ вазият ҳам: у 22 йиллик фаолиятидан сўнг жамоани тарк этганди. Кийиниш хонасида кўплаб янги юзлар пайдо бўлди. У ердаги муҳит ҳар доим ҳам осон кечмасди. Сардор бўлгач, нафақат яхши, балки ёмон ҳолатларга ҳам дуч келишингга тўғри келади. 2019 йилда кўпчилик айнан мен ҳақимда гапирарди. Хатолар, қизил ва сариқ карточкалар – клубдаги ҳамма нарса ёмон эди.
Микел Артета — ҳозирги даражамга эришишимга ёрдам берган ягона инсон. Усиз 2019 йилда [мухлислар билан бўлган воқеадан сўнг] менда заррача имконият йўқ эди», — дея Жаканинг сўзларидан иқтибос келтиради ESPN.
