Дунёнинг тўққизинчи ракеткаси, америкалик теннисчи Бен Шелтон 2009 йилдан бери «Катта дубулға» туркумига кирувчи турнир финалига чиққан энг ёш, европалик бўлмаган, теннисчига айланди, деб хабар бермоқда Opta Ace.
Аввалроқ Шелтон US Open-2026 яримфиналида ҳамюрти Френсис Тиафони 4:6, 6:3, 6:3, 7:5 ҳисобида мағлуб этган эди.
Маълумот учун, Шелтон 23 ёшида илк бор «Катта дубулға» туркумига кирувчи турнир финал йўлланмасини қўлга киритди. Бундай натижага сўнгги бор 2009 йилги US Open финалида иштирок этган аргентиналик Хуан-Мартин дел Потро эришган эди. Бундан ташқари, Шелтон 2006 йилдан бери «Катта дубулға» турнирларининг финалига чиққан энг ёш америкалик спортчига айланди ва бу кўрсаткич бўйича Уимблдон финалида иштирок этган Энди Роддикни ортда қолдирди.
Эслатиб ўтамиз, US Open-2026 чемпионлиги учун Бен германиялик теннисчи Александр Зверев (рейтингнинг 2-рақамли теннисчиси) билан куч синашади. Учрашув 13 сентябрга белгиланган.
