«Ноттингҳэм Форест» бош мураббийи Оливер Гласнер «Манчестер Сити»га нисбатан молиявий қоидабузарликлар юзасидан олиб борилаётган иш бўйича якуний қарор имкон қадар тезроқ чиқарилиши кераклигини айтди. Мутахассиснинг фикрича, мазкур ишнинг узоқ давом этиши Англия Премер-лигасининг яхлитлигига салбий таъсир кўрсатмоқда.
Аввалроқ мустақил комиссия «Манчестер Сити»ни тўққиз йил давомида молиявий қоидаларни бузганликда, жумладан, даромадларни 900 млн фунт стерлингдан ортиқ миқдорда сунъий ошириб кўрсатганликда айбдор деб топгани хабар қилинганди. Клубнинг апелляцияси рад этилган тақдирда, жамоага нисбатан очко олиб ташлаш ёки лигадан четлатиш каби спорт санкциялари қўлланиши мумкин.
Гласнер ўз фикрини билдирар экан, «Кристал Пэлас» билан боғлиқ вазиятни мисол қилиб келтирди. Лондон клуби УEФАнинг бир нечта клубга эгалик қилиш бўйича қоидаларини бузгани сабабли 2025/26 йилги мавсумда Европа лигасида қатнашиш ҳуқуқидан маҳрум этилган эди.
«Якуний қарорни кутайлик, аммо мен унинг имкон қадар тезроқ чиқарилишини истардим. «Пэлас» билан боғлиқ вазиятда биз Европа лигасида ёки Конференсиялар лигасида ўйнашимизни билмасдик. Аввал бизга қарор пайшанба куни эълон қилиниши айтилди, кейин эса бу муддат душанбага кўчирилди. Жараён доимий равишда ортга сурилди. Охир-оқибат, Конференциялар лигаси бошланишига атиги 10 кун қолганида якуний қарорни олдик.
Шу сабабли бу иш имкон қадар тезроқ якунланиши керак, деб ҳисоблайман. Бу ҳолат нафақат Англияда, балки бутун дунёда Премер-лигага зарар етказмоқда. Айниқса, Европада бу катта муҳокама мавзусига айланган. Энг муҳими — лиганинг яхлитлиги. Чунки мухлислар мусобақага бўлган ишончини йўқотса, уни томоша қилишни ҳам тўхтатади», — дея Гласнернинг сўзларини The Guardian нашри келтирмоқда.
Эслатиб ўтамиз, Спорт арбитраж суди «Кристал Пэлас»нинг Европа лигасида қатнашишига рухсат бермаган. Суд Лондон клуби эгаси Жон Текстор бир вақтнинг ўзида «Кристал Пэлас» ва Франциянинг «Лион» клуби устидан ҳал қилувчи таъсирга эга бўлганини аниқлаган.
Оливер Гласнер 2024 йил февралидан 2026 йил июнигача «Кристал Пэлас» бош мураббийи сифатида ишлаган.
