Абу-Дабидан бўлган «Манчестер Сити» эгалари клубни сотиш эҳтимолини кўриб чиқиши мумкин. Бу ҳақда Financial Times хабар берди.
Нашр маълумотига кўра, Англия Премер-лигасининг молиявий қоидабузарликлар бўйича мустақил комиссияси чиқарган қарордан кейин ҳам клуб эгалари «Манчестер Сити»ни бошқаришда қолишга қатъий қарор қилган эди. Бироқ мухлисларнинг ушбу қарорга муносабати кутилганидан кўра турлича бўлди.
«Манчестер Сити»нинг 2003 йилда лавозимини тарк этган собиқ раиси Девид Бернштейн клуб эгалари келажакдаги режаларини қайта кўриб чиқиши мумкинлигини таъкидлади.
«Савол шуки, эгалари клубга эгалик қилишни давом эттиришни хоҳлайдими? Авваллари бу улар учун ажойиб реклама воситаси эди, аммо энди вазият фалокатга айланди», — деди Бернштейн.
Мазкур вазият Бирлашган Араб Амирликларининг Буюк Британия иқтисодиётига киритаётган инвестициялари келажаги ҳақидаги саволларни ҳам юзага келтирди. Бироқ Британия ҳукумати вакиллари БАА инвестициялари мамлакатдан олиб чиқиб кетилиши ортидан жиддий оқибатлар юзага келишини кутмаяпти.
Британия ҳукуматининг бир амалдори «Манчестер Сити» эгалари мамлакат сиёсий тизимини тушунадиган жиддий инсонлар эканини таъкидлади. Ҳукуматнинг собиқ вакили эса БАА инвестицияларининг Буюк Британиядан олиб чиқиб кетилиши мумкинлиги ҳақидаги хавотирларни ҳаддан ташқари бўрттирилган деб баҳолади.
Маълумот учун, «Манчестер Сити» эгалари клубни сотиш бўйича расман қарор қабул қилгани ҳақида хабар йўқ. Financial Times материалида бу эҳтимолий сценарий сифатида муҳокама қилинган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади