Саудия Арабистонининг «Ал Иттиҳод» клуби вингери Мусса Диаби фаолиятини «Интер»да давом эттириши мумкин. Бу ҳақда Gazzetta dello Sport нашри хабар берди.
Манбага кўра, «нерадзурри» франциялик 27 ёшли футболчи учун курашга қўшилган. Диабига унинг собиқ клуби «Байер» ҳам қизиқиш билдириб келмоқда.
Қайд этиш жоизки, у 2019–2023 йилларда айнан Леверкузен жамоаси шарафини ҳимоя қилган.
«Интер» Диабини дастлаб бир мавсумга ижарага олиш, шартномага эса футболчини кейинчалик 35 миллион евро эвазига сотиб олиш опциясини киритишни режалаштирмоқда. Бироқ «Ал Иттиҳод»нинг позицияси трансферни мураккаблаштирмоқда. Аввалроқ саудияликлар шу каби таклифга рози бўлмагани ҳақида ҳам хабарлар тарқалган.
Мусса ўтган мавсумда Жидда клуби сафида барча турнирлар доирасида 43 та учрашувда майдонга тушиб, 6 та гол ва 15 та голли узатма қайд этган.
Футболчининг Саудия клуби билан амалдаги шартномаси 2029 йилгача мўлжалланган.
