UFC ва Zuffa Boxing президенти Дана Уайт Тайсон Фюри ҳамда Энтони Жошуа ўртасидаги жангни ташкил этиш билан боғлиқ муаммолар фонида промоутер Эдди Ҳирнни кескин танқид қилди.
«Жангнинг ўтказилишига ёрдам бериши керак бўлган одам доимо унга халақит бериб келди. У ҳеч қандай фойда келтирмади. Эдди Ҳирнчалик кўп бемаъни гапирадиган одамни учратганманми, билмайман.
Балки кейинги уч соат ичида у 652 мингта интервю бериб, барча саволларга жавоб берар. Агар Ҳирн ҳақиқатан ҳам бу жанг ҳақида қайғурганида, у аллақачон ўтказилган бўларди.
Қолаверса, уни ўзи ҳам молиялаштириши мумкин эди. Буни миллион марта айтганман: жангни молиялаштир, чипталарни сот, телевидение билан шартнома туз ва трансляция ҳуқуқини сот.
Ҳозир эса буларнинг барчаси шунчаки цирк. Кейинги уч-тўрт кун ичида кўпроқ маълумотга эга бўламиз ва ҳаммаси нима билан тугашини кўрамиз», — деди Уайт.
Аввалроқ Фюри — Жошуа жанги 11 декабр куни Кардифда ўтказилиши хабар қилинганди. Бироқ Ҳирн Уайтнинг жангни ташкил этиш жараёнида иштирок этишига қарши чиқмоқда. Шу сабабли британиялик боксчилар ўртасидаги кутилган тўқнашув бекор қилиниши ҳам мумкин.
