Каталониянинг «Барселона» клуби ҳужумчи Лионел Мессининг Аргентина миллий жамоасидаги хайрлашув ўйинига муносабат билдирди.
«Пекиндаги олтиндан тортиб, ҳар қадамда «албиселесте» билан тарих яратувчи унутилмас мартабагача Табриклаймиз, Лео. Сен Аргентина миллий жамоаси либосини янада машҳур қилишда давом этяпсан!», - дейилади «кўк-анорранглилар» матбуот хизмати хабарида.
Эслатиб ўтамиз, Лионел Месси «Барселона» клуби академияси тарбияланувчиси ҳисобланади. У 2005 йилдан 2021 йилгача каталонияликлар сафида тўп тепган.
Маълумот учун, Лионелнинг хайрлашув ўйинида Аргентина миллий жамоаси Бенинни 3:0 ҳисобида мағлуб этди. 39 ёшли ҳужумчи ушбу баҳсда битта гол урди ва шерикларига иккита голли узатма етказиб беришни уддалади.
