«Манчестер Сити» ва Испания миллий жамоаси собиқ яримҳимоячиси Давид Силва уч йиллик танаффусдан сўнг профессионал футболга қайтишга қарор қилди. Бу ҳақда AS нашри хабар бермоқда.
Қайд этилишича, 40 ёшли футболчи Ҳонконг чемпионатида иштирок этадиган «Supreme Sha Tin» клуби билан қисқа муддатли шартнома имзолади.
Манбага кўра, Силва янги жамоасига қўшилишдан мамнун эканини билдириб, Ҳонконгдаги футбол, маданият ва маҳаллий ҳаёт билан яқиндан танишишни интиқлик билан кутаётганини айтган.
Эслатиб ўтамиз, Давид 2023 йилнинг ёзида «Реал Сосиедад» сафида олган жиддий тизза жароҳатидан сўнг футболчилик фаолиятини якунлаган эди. Энди у уч йилдан ортиқ танаффусдан кейин яна майдонга қайтади.
Футболчи ўзининг ёрқин фаолиятини «Манчестер Сити»да ўтказиб, клуб сафида барча турнирлар доирасида жами 436 та учрашувда 77 та гол уриб, 136 та голли узатма амалга оширган. У клуб билан тўрт марта Премер-лига чемпиони бўлган, Испания миллий жамоаси сафида эса 125 та учрашув ўтказиб, жаҳон чемпионати ва икки марта Европа чемпионатида ғолиб чиққан.
Мухлислар бу янгиликни Telegram’да муҳокама қилмоқда
Изоҳлар Telegram’да очилади