«Атлетико» Хулиан Алварес трансфери масаласида «Барселона» устидан FIFA’га шикоят киритмоқчи.
Мадрид клуби раҳбарияти каталонияликларни амалдаги шартномага эга бўлган футболчи билан рухсатсиз музокара олиб борганликда айбламоқда.
«Атлетико» бош директори Мигел Анхел Хил Марин клубнинг ушбу масаладаги позициясини изоҳлади.
«Бизнинг мажбуриятимиз — «Атлетико» манфаатларини ҳимоя қилиш. Шу сабабли биз «Барселона» устидан FIFA’га шикоят киритмоқчимиз. Чунки улар амалдаги шартномага эга футболчи билан ҳимояланган даврда музокара олиб борган», — дея Мариннинг сўзларидан келтиради инсайдер Фабрицио Романо.
Маълумот учун, FIFA қоидаларига кўра, агар футболчининг шартномаси якунланишига олти ойдан кўпроқ вақт қолган бўлса, бошқа клуб унинг амалдаги жамоасини расман хабардор қилмасдан ёки рухсат олмасдан футболчи билан бевосита музокара олиб бориши мумкин эмас.
