Асрор Алиқулов: «Орол» билан 9 очколик фарқ жуда катта»

Суперлигадан кейинги ўринда турувчи Пролигада ҳам кураш қизғин ва муросасиз тарзда кечаётганига ишонасизми? Бу ҳақиқат. Ҳар бир турда, айниқса, фаворитлар иштирокидаги учрашувларга эътибор тобора ортиб боряпти.

Иккинчи ўринда бораётган Ғузорнинг «Шўртан» клуби 17-турда ўз уйида «Лочин»га мағлубиятга учраб жуда қимматли очколардан маҳрум бўлди. Ҳозирда «Шўртан» 33 очко билан 2-ўринда ва пешқадам «Орол»дан 9 очкога ортда қоляпти.

Оғриқлик мағлубиятдан кейин жамоани руҳан тиклаш қийин кечмайдими? Бош мураббий Асрор Алиқулов бир қатор саволларга жавоб қайтарди.

- Асрор Чориевич «Лочин»дан учралган мағлубиятга қандай изоҳ берасиз?

- Ўйин оғир кечишини билардик. Чунки биринчи даврадаги учрашув ҳам оғир, курашларга бой ва қўполлик асосида ўтган. Руҳий томонлама ҳам футболчилар бир-бирини аямайди. Курашди, жамоа кўпроқ қарши ҳужумда ўйнади. Қўполлик кўп ишлатишди. Афсуски, қулай имкониятлардан гол ура олмадик ва ўзимиз гол ўтказиб юбордик. Ҳужумчимиз бирга-бир ҳолатдан фойдалана олмади. «Лочин» охиригача ҳимояланади. Умуман олганда, аксарият футболчиларга ўйиндаги курашишгани учун эътирозим йўқ. Ҳимояда биргина хатодан «Лочин» жазолади ва биз мағлубиятга учрадик. Рақиб жамоани ғалаба билан табриклайман.

- «Орол» билан 9 очколик фарқ бўлди. Бу биринчи ўрин учун курашга қанчалик таъсир қилади?

- Кўряпсиз, ҳар ўйин оғир. 9 очколик фарқни ўйинлар сонини ҳисобга оладиган бўлсак, жуда катта фарқ. Лекин қўлни туширмаслигимиз керак. Ҳар бир учрашув оғир кечяпти. Агар «Лочин» дарвозасига биринчи бўлиб гол урганимизда ғалаба қозонишимиз мумкин эди. ФарДУ билан учрашувда ҳам ғалаба қозонаётгандик, рақибда ҳеч қандай имконият йўқ эди. Аммо ўзимизни хатоларимиз голга олиб келди. Ҳимояда ротация қилдик. Қайсидир ўйинчиларга дам бердик, хатолар устида ишладик. Ҳимоядаги хато бизга қимматга тушди.

- Рақиб қарши ҳужумларда гол уриб кетяпти. Бугунги кунда қарши ҳужум тактикасидан фойдаланиш қанчалик ўзини оқлаяпти?

- Бизга очко керак. «Лочин»га бешликка кириш мақсади қўйилган. Улар ҳам ҳар бир учрашувда курашади. Бизни мақсадимиз Суперлига. Шунинг учун иложи йўқ, ҳар бир баҳсга фақат ғалаба учун чиқамиз. Ўйинларда ёпиқ ўйин кузатиляпти. Биз гол урганимизда, ҳисобда олдинда борсак биз ҳам ҳимояга эътибор қаратишимиз мумкин. Лекин гол керак бўляпти, ҳужумлар қиляпмиз. Гол ура олмасак очко берилмайди.

- «Лочин» таркибида «Шўртан»га бегона бўлмаган бир қанча футболчилар бор. Уларнинг ғалабасида бунинг ҳам таъсири бўлдими?

- Айримлари руҳият, шижоат билан ўйнаб кетишган. Айримлари «Шўртан»дан хафалиги ва жамоага лойиқлигини исботлаш учун «Лочин» футболчилари ўзларини ҳам, бизни ҳам аяшгани йўқ. Рақиб ғалаба қозонди, биз ютқаздик. Шу боис баҳона топиш ниятимиз йўқ.

- Юрий Колочков ўйин қайдномасида кўринмаяпти. Ўрнида тўп тепган Анвар Муродов унинг йўқлигини боса олдими?

- Колочков ФарДУдан кейин жароҳат олганди. Машғулотларда ҳам қатнаша олгани йўқ. Кейинги ўйинга тикланиши керак. Муолажалар оляпти, шифокорларимиз ишлашяпти. Ҳужум чизиғимизда муаммолар борлиги учун Муродовни жалб қилдик. Кўряпсиз, кўп югуриш, кўп меҳнат қилиш керак. Анвар меҳнаткаш футболчи. Аммо иккита учрашувда ҳам у бирга-бир вазиятда 100 фоизли имкониятлардан фойдалана олмади. Балки унда бироз танаффус бўлгани ҳам таъсир қилгандир. Омадсиз ўйин ўтказди.

- Энг аламли мағлубият айнан «Лочин»га қарши бўлди, деб ҳисоблайсизми?

- Ҳисоблаймиз. Футболчиларга ҳам шу фикрни айтдим. Кимга бўлса ҳам фақат «Лочин»га эмас. Ўйинчилари бизда ўйнаб кетишган, биз эса улардан ўйинчи оламиз. Шу томонлама энг аламлиси ушбу мағлубият десам тўғри бўлади.