«Мундиалдан кейин мотивациям янада ошди» — Беҳруз Каримов

Жаҳон чемпионати миллий жамоамиз шарафини ҳимоя қилган ва кашфиёт футболчи сифатида эътироф этилган 19 ёшли қанот ҳимоячиси Беҳруз Каримов яқинда Швейцариянинг «Лугано» клубига трансфер қилинганини яхши биласиз.

Ҳамюртимиз янги жамоаси таркибида иккита учрашувда майдонга тушишга ҳам улгурди. Унинг учун барчаси яхши бошланди ва шундай давом этишини тилаймиз.
Tribuna.uz журналисти Беҳруз Каримов билан боғланди ва интервю олди.

- Беҳруз, Швейцариядаги ҳаётингиз ҳам бошланди. Дастблаки кўникиш ва мослашиш жараёни қандай ўтмоқда?

- Швейцарияда мослашиш жуда яхши бўляпти. Бу ерда асосан бироз тил билан муаммо бор. Бу ерда кўпроқ итальян тилида гаплашишади. Мен эса бу тилда мулоқот қилишга бироз қийналаман. Шу сабабли уларга олдиндан айтиб қўйганманки, мен билан инглиз тилида гапиришади. Чунки инглиз тилини бироз билганим учун ушбу тилда гаплашяпмиз.

- «Лугано»даги дебютингиз халқаро даражадаги ўйинга тўғри келди ва муваффақиятли ўтди. Дебют ўйинингиз қандай ўтди, мундиалдаги илк ўйинингиз каби ҳаяжон сезилдими?

- Ҳақиқатан «Лугано»даги дебютим жуда муҳим бўлди. «Маккаби»га қарши ўйнадик. Барибир ҳаяжон бўлди. Чунки бутун жамоа билан масъулиятни ҳис қилиб тургандик. Мақсад Конференция лигасига чиқиш эди. Кўпроқ менда ҳаяжон сезилди. Негаки, «Лугано» шунча ҳаракат қилиб, ушбу жойгача етиб келганди. Клуб ушбу ҳал қилувчи босқига етиб келганида мен улардан-да, кўпроқ ҳаракат қилдим. Ҳаяжон жаҳон чемпионати даражасидаги каби деса ҳам бўлади. Чунки уларни меҳнати кўз олдимга келди. Шунинг учун ҳажон сезилди.

- Нима учун «Лугано»ни танладингиз?

- Менга келган вариантларни ҳаммасини кўриб чиқдим. Швейцария чемпионати кучлироқ ва Европа эшиклари очиқ бўлгани учун «Лугано»ни танладим. Қолаверса, бу ерда ўйин амалиёти ҳамда ўзимга бўлган ишончни кучайтириш ушбу жамоани танладим.

- Сафарга кетишингиздан аввал устозларингизга 5000 доллардан мукофот бериб, уларни дуосини олибсиз. Бу ташаббус кимдан чиқди?

- Бу ташаббусни анча олдин ўйлагандик. Агентим билан маслаҳатлашган ҳолда улар билан ўтириш қилиб, дуосини олишни истадик. Агентим билан гаплашдик ва рози бўлган ҳолда кейин шу ишга қўл урдик.

- Беҳруз, шу ёшингизда жаҳон чемпионатига бордингиз, ўйнадингиз ва бугун Европадасиз. Ҳаммаси жуда тез ва бу сиз учун худди туш каби туюлмаяптими?

- Мундиалдан кейин янада кўпроқ мотивация олдим. Чунки катта тажриба бўлди. Бу тажрибаларни ишлатиш мақсадида яна кўпроқ ўйин амалиёти ҳамда ўзимга бўлган ишонч жаҳон чемпионатидан кейин янада кўпроқ бўлди.

- Жаҳон чемпионатидан нима ўргандингиз?

- Жаҳон чемпионатидан кўп нарса ўргандим. Катта футболда қанақа ўйнаш керак, жаҳон миқёсидаги ўйинчилар қанақа, улардан қандай ўрнаклар олдим? Ҳаммасини ўргандик ва катта тажриба олдим.

- Клубда сизга энг кўп ёқаётган нарса нима?

- Клубимда энг ёққан нарса – менга бўлган муносабат бўлди. Бу биринчи ўринда. Келишим билан мени зўр муносабатда кутиб олишди. Бу менга жуда ёқди. Ҳамма билан яхши чиқишиб олдим. Клубдагилар мени кўпроқ қўллаб-қувватлашяпти. Уларни тилини яхши тушунмаслигим учун мен кўпроқ ўрганиб, ўз маслаҳатларини беришяпти ва ҳар жиҳатдан қўллаб-қувватлашмоқда.

- Каннаваро сизни кашф қилди. «Лугано»га ўтишдан аввал у билан ҳам маслаҳатлашдингизми?

- Шахсан агентларим маслаҳатлашган, ўзим гаплашмадим. «Лугано»га ўтишим ҳал бўлганидан кейин Каннаваро билан ҳам гаплашдим. Менга савол берди: нимага ҳалигача кетмадинг деди. Виза кутаётганимизни айтдим ва у «Лугано» яхши жамоа эканини, тезроқ қўшилишим кераклигини айтди.

- Шунингдек, сиз Швейцария чемпионатида «Лугано» сафида «Сьон»га қарши майдонга тушдингиз ва ғалаба қозондинглар. Бу ўйин қандай ўтди?

- Охирги ўйинни «Сьон»га қарши ўтказдик. Кучли жамоа эди. Мен майдонга тушганда ҳисоб 1:1 эди. Гол уриш мақсадида, жамоамга фойдам тегишини истаб майдонга тушдим. Тушишим билан иккинчи голни урдик. Кейин натижани ушлаб қолиш учун ҳимояга эътибор қаратдик ва Худога шукрки, ҳисобни сақлаб қолдик. 4 та учрашувда мағлубиятсиз ва биринчи ўринда кетяпмиз. Худо хоҳласа, буни яна давом эттирамиз. Мақсадимиз чемпионлик. Бу жамоа билан кўп нарсага эришса бўлади. Жамоавий футбол жуда зўр шаклланган. Шунинг учун клубга тезроқ қўшилиб, ўз футболимни кўрсатмоқчиман.